അറിവ് പകരാനും പഠിക്കാനും പ്രായമില്ല; നന്ദ മാസ്റ്ററുടെ ഓര്‍മയില്‍ കാന്തിര ഗ്രാമം

രാജ്യം ഈ വര്‍ഷം അദ്ദേഹത്തിന് പത്മശ്രീ നല്‍കി ആദരിച്ചിരുന്നു. കാന്തിര ഗ്രാമത്തില്‍ താത്കാലികമായി മുളയും കല്ലും കൊണ്ട് കെട്ടിയുണ്ടാക്കിയ കുടിലില്‍ ഇരുന്നാണ് അദ്ദേഹം ഗ്രാമീണര്‍ക്ക് അക്ഷരം പകര്‍ന്നത്.

ജജ്‌പൂര്‍:സികിന്ത ബ്ലോക്കിലെ കാന്തിര ഗ്രാമ അധ്യാപകൻ നന്ദ കിഷോര്‍ പ്രുസ്തി അന്തരിച്ചു. 104 വയസായിരുന്നു. ഏറെ പ്രത്യേകതകള്‍ നിറഞ്ഞതായിരുന്നു നന്ദ കിഷോര്‍ പ്രുസ്തിയുടെ ജീവിതം. വെറും ഏഴാം ക്ലാസ് വിദ്യാഭ്യാസം മാത്രമുള്ള നന്ദ മാസ്റ്റര്‍ ഗ്രാമത്തിലെ മുഴുവൻ പേരുടെയും അധ്യാപകനായിരുന്നു. രാജ്യം ഈ വര്‍ഷം അദ്ദേഹത്തിന് പത്മശ്രീ നല്‍കി ആദരിച്ചിരുന്നു.

കാന്തിര ഗ്രാമത്തില്‍ താത്കാലികമായി മുളയും കല്ലും കൊണ്ട് കെട്ടിയുണ്ടാക്കിയ കുടിലില്‍ ഇരുന്നാണ് അദ്ദേഹം ഗ്രാമീണര്‍ക്ക് അക്ഷരം പകര്‍ന്നത്. രാവിലെ കുട്ടികള്‍ക്കും വൈകിട്ട് മുതിര്‍ന്നവര്‍ക്കുമായിരുന്നു ക്ലാസ്. നന്ദ മാസ്റ്റര്‍ക്ക് സര്‍ക്കാര്‍ ജോലി ലഭിച്ചെങ്കിലും പിതാവ് ജോലിക്ക് വിട്ടില്ല.

ഇതോടെയാണ് പ്രുസ്തി വിദ്യാഭ്യാസ യജ്ഞം ആരംഭിക്കുന്നത്. നാട്ടിലുള്ള യുവാക്കളെ പേര് എഴുതാനും ഒപ്പിടാനം മാതൃഭാഷ വായിക്കാനും പഠിപ്പിക്കുകയായിരുന്നു ലക്ഷ്യം.

അന്ന് തുടങ്ങിയ അധ്യാപനം മരണം വരെയും തുടര്‍ന്നു. നന്ദ കിഷോറില്‍ നിന്നും ആദ്യാക്ഷരങ്ങള്‍ പഠിച്ച പലരും പിന്നീട് ഡോക്ടര്‍, എഞ്ചിനീയര്‍, അധ്യാപകര്‍, അഭിഭാഷകര്‍, രാഷ്ട്രീയ പ്രവര്‍ത്തകര്‍ തുടങ്ങി വിവിധ നിലകളിലെത്തി. നാട്ടിലെ ഒരു ഹനുമാന്‍ ക്ഷേത്രത്തിന് പുറത്ത് തുറന്ന മരത്തണലില്‍ തയ്യാറാക്കിയ തരയില്‍ ഇരുത്തിയാണ് അദ്ദേഹം കുട്ടികള്‍ക്ക് പാഠങ്ങള്‍ പറഞ്ഞു കൊടുക്കുന്നത്.

അറിവ് പകരാനും നേടാനും പ്രായമൊരു അതിര്‍വരമ്പല്ലെന്ന് തെളിയിക്കുകയാണ് നന്ദകിഷോര്‍. കൊവിഡാനന്തര ചികിത്സക്കിടെ ഭുവനേശ്വറിലെ സ്വകാര്യ ആശുപത്രിയില്‍ വച്ചായിരുന്നു അന്ത്യം.