മുണ്ട്ക തീപിടിത്തം : അഗ്നിബാധക്കിരയായ കെട്ടിടത്തിന്‍റെ ഉടമ പിടിയിൽ

കെട്ടിടത്തിന്‍റെ ഉടമ മനീഷ് ലക്രയെയാണ് പൊലീസ് പിടികൂടിയത്

ന്യൂഡൽഹി :ഡല്‍ഹിയിലെ മുണ്ട്കയിൽ 27 പേരുടെ മരണത്തിനിടയാക്കിയ വൻ തീപിടിത്തിന് പിന്നാലെ ഒളിവിലായിരുന്ന കെട്ടിട ഉടമ പിടിയിൽ. കെട്ടിടത്തിന്‍റെ ഉടമ മനീഷ് ലക്രയാണ് സംഭവത്തിന് രണ്ട് ദിവസത്തിന് ശേഷം അറസ്റ്റിലായത്. വെള്ളിയാഴ്‌ചയാണ് ഡൽഹിയിലെ മുണ്ട്‌ക മെട്രോ സ്‌റ്റേഷനുസമീപമുള്ള 3 നില കെട്ടിടത്തിന് തീപിടിച്ചത്.

സിസിടിവി ക്യാമറകളുടെയും റൗട്ടർ നിർമാണ കമ്പനിയുടെയും ഓഫിസായ കെട്ടിടത്തിന്‍റെ ഒന്നാം നിലയിലാണ് തീപിടിത്തമുണ്ടായത്. അഗ്നിബാധയുടെ കാരണം ഇനിയും വ്യക്തമല്ല. സംഭവത്തിൽ 21 സ്‌ത്രീകളടക്കം 27 പേരാണ് മരിച്ചത്.

കെട്ടിടത്തിന് ഒരു സ്റ്റെയര്‍കേസ് മാത്രമേ ഉണ്ടായിരുന്നുള്ളൂ. അതുകൊണ്ട് തന്നെ പലര്‍ക്കും കെട്ടിടത്തിന് പുറത്തുകടക്കാന്‍ സാധിച്ചിരുന്നില്ല. അപകടസ്ഥലത്ത് നിന്നും 50ഓളം പേരെ രക്ഷപ്പെടുത്തിയിട്ടുണ്ട്. കെട്ടിടത്തിലുണ്ടായിരുന്ന 19 പേരെ കണ്ടെത്താനായിട്ടില്ല.