മുംബൈ :ആഡംബര കപ്പലായ കോർഡെലിയ ക്രൂയിസിലെ ലഹരിപ്പാര്‍ട്ടി സംബന്ധിച്ച് ഒന്നുമറിയില്ലെന്ന വാദവുമായി ഉടമ ജർഗൻ ബെയ്‌ലോം. എൻസിബി ചോദ്യം ചെയ്‌തതിന് ശേഷമായിരുന്നു അദ്ദേഹത്തിന്‍റെ പ്രതികരണം. തങ്ങൾ സംഘാടകര്‍ അല്ലെന്നും നടപടിക്രമങ്ങൾ അനുസരിച്ച് അധികാരികളുമായി സഹകരിക്കുന്നുണ്ടെന്നും അദ്ദേഹം കൂട്ടിച്ചേർത്തു.
ആര്യൻ ഖാൻ ഉൾപ്പടെ മൂന്ന് പേർ എൻസിബി കസ്റ്റഡിയിൽ
അതേസമയം ലഹരിപ്പാർട്ടി സംഘടിപ്പിച്ചതില്‍, ബോളിവുഡ് താരം ഷാരൂഖ് ഖാന്‍റെ മകന്‍ ആര്യന് ഖാന്‍ ഉൾപ്പടെ മൂന്ന് പേരെ കോടതി എൻസിബി കസ്റ്റഡിയിൽ വിട്ടു. ഒക്‌ടോബർ നാല് വരെയാണ് കസ്റ്റഡി കാലാവധി. ആര്യൻ ഖാൻ, മുൻമുൻ ദാമേച്ച, അർബാസ് മെർച്ചറ്റ് എന്നിവരുടെ അറസ്റ്റ് രേഖപ്പെടുത്തിയതിന് ശേഷം അഡീഷണൽ മെട്രോപൊളിറ്റൻ മജിസ്‌ട്രേറ്റ് ആർ കെ രാജഭോസാലെയുടെ പ്രത്യേക അവധിക്കാല കോടതിക്ക് മുന്‍പാകെ ഹാജരാക്കുകയായിരുന്നു.