ലക്‌നൗ:നിയമസഭ തെരഞ്ഞെടുപ്പിന് മുന്നോടിയായി ഉത്തർപ്രദേശിൽ രാഷ്‌ട്രീയ കൂടുമാറ്റം ശക്‌തിയായി തുടരുന്നു. സമാജ് വാദി പാർട്ടിയിലേക്കുള്ള ബിജെപി നേതാക്കളുടെ കൊഴിഞ്ഞ്‌ പോക്കിന് പിന്നാലെ സമാജ് വാദി പാർട്ടിയിൽ നിന്നും, കോണ്‍ഗ്രസിൽ നിന്നും പ്രമുഖ നേതാക്കൾ ബിജെപിയിലേക്ക് ചുവട് മാറ്റി.
സമാജ് വാദി പാർട്ടിയെ ഞെട്ടിച്ചുകൊണ്ട് മുലായം സിങ് യാദവിന്‍റെ ഭാര്യ സഹോദരൻ പ്രമോദ് ഗുപ്‌തയാണ് ബിജെപിയിൽ ചേർന്നത്. പാർട്ടിക്കെതിരെയും അഖിലേഷ്‌ യാദവിനെതിരെയും കനത്ത വിമർശനങ്ങളാണ് പ്രമോദ് ഗുപ്‌ത ഉന്നയിച്ചത്. സമാജ് വാദ് പാർട്ടിയിലെ എല്ലാവരേയും അഖിലേഷ്‌ യാദവ് മൂലയ്‌ക്കിരുത്തി എന്നും ബിജെപിയുടെ നയം ഇഷ്‌ടമായത് കൊണ്ടാണ് അവിടേക്ക് പോയതെന്നും പ്രമോദ് ഗുപ്‌ത പറഞ്ഞു.
മുലായം സിങ് യാദവിന് പ്രായമായി. അതിനാൽ തന്നെ കുടുംബത്തിലെ ആരും അദ്ദേഹത്തെ അനുസരിക്കുന്നില്ല. അഖിലേഷ്‌ യാദവ് അദ്ദേഹത്തെ അവഗണിച്ചു. അഖിലേഷിന്‍റെ ആശയങ്ങളെ ആര് എതിർത്താലും അവരെ അദ്ദേഹം ഒതുക്കികളയുന്നു. പ്രമോദ് ഗുപ്‌ത കൂട്ടിച്ചേർത്തു.