നടന്നുപോകാൻ വഴി ചോദിച്ചു, അമ്മയ്ക്കും‌ മകൾക്കും നാട്ടുകാരുടെ ക്രൂര മർദനം ; വീഡിയോ

നിസ്സാര കാര്യത്തെ ചൊല്ലി അമ്മയെയും മകളെയും വളഞ്ഞിട്ടാക്രമിച്ച് നാട്ടുകാര്‍

മിർസാപൂർ :ഉത്തർപ്രദേശിലെ മിർസാപൂരിൽ നിസ്സാര പ്രശ്‌നത്തിന്‍റെ പേരിൽ അമ്മയേയും മകളേയും ഇരുമ്പുവടിയും ചുറ്റികയും ഉപയോഗിച്ച് ക്രൂരമായി മര്‍ദിച്ചു. കത്ര കോട്‌വാലി മേഖലയിലെ തകിയ ദനു ഷാ പ്രദേശത്താണ് സംഭവം.

പുതിയ വീട് പണിയുന്നതിനാൽ താൽക്കാലികമായി മദ്രസയിൽ താമസിക്കുകയായിരുന്നു അക്രമത്തിനിരയായ അമ്മയും മകളും. ഇതിനിടെ ഗോവണി ഇറങ്ങിവരുമ്പോള്‍ വഴിയിൽ നിന്ന മറ്റൊരു സ്ത്രീയോട് മാറിത്തരാന്‍ ആവശ്യപ്പെട്ടു. ഇതിൽ അസ്വസ്ഥയായ സ്ത്രീ ഇവരുമായി കലഹിക്കുകയായിരുന്നു.

ഇവരുടെ ശബ്‌ദം കേട്ട് തടിച്ചു കൂടിയ പ്രദേശവാസികൾ അമ്മയേയും മകളേയും ക്രൂരമായി മർദിച്ചു. അതേസമയം മാലിന്യം തള്ളുന്നതുമായി ബന്ധപ്പെട്ടാണ് തർക്കമുണ്ടായതെന്നാണ് പൊലീസ് വാദം. സംഭവത്തിന്‍റെ വീഡിയോ വൈറലായതോടെ പൊലീസ് 3 പേർക്കെതിരെ കേസെടുത്തു.