മോഹന്‍ലാലിന്‍റെ (Mohanlal) ആദ്യ സംവിധാന സംരംഭമായ 'ബറോസ്' (Barroz) സംബന്ധിച്ചുള്ള അപ്‌ഡേറ്റുകള്‍ക്കായി ആകാംക്ഷയോടെ കാത്തിരിക്കുകയാണ് ആരാധകര്‍. സിനിമയുമായി ബന്ധപ്പെട്ടുള്ള പുതിയ അപ്‌ഡേറ്റ് നാളെ (നവംബര്‍ 4) വൈകിട്ട് അഞ്ച് മണിക്ക് പുറത്തുവിടും (Barroz update). ഇക്കാര്യം മോഹന്‍ലാല്‍ തന്‍റെ ഫേസ്‌ബുക്ക് പേജിലൂടെയാണ് അറിയിച്ചിരിക്കുന്നത്.
'നാളെ ഇന്ത്യന്‍ സ്‌റ്റാന്‍ഡേഡ് സമയം വൈകിട്ട് അഞ്ച് മണിക്ക് വരുന്ന ബറോസ് അപ്‌ഡേറ്റിനായി കാത്തിരിക്കുക' - മോഹന്‍ലാല്‍ കുറിച്ചു. താരത്തിന്‍റെ ഈ പോസ്‌റ്റിന് പിന്നാലെ ആവേശം പ്രകടിപ്പിച്ച് ആരാധകര്‍ കമന്‍റ് ബോക്‌സുകള്‍ നിറച്ചു (Mohanlal Facebook post).
ജിജോ പുന്നൂസിന്‍റെ 'ബറോസ്: ഗാര്‍ഡിയന്‍ ഓഫ് ഡി ഗാമാസ് ട്രെഷര്‍' എന്ന നോവലിനെ ആസ്‌പദമാക്കിയാണ് സിനിമയുടെ തിരക്കഥ ഒരുക്കിയിരിക്കുന്നത്. ഇന്ത്യയിലെ ആദ്യ ത്രീഡി ചിത്രമായ 'മൈ ഡിയര്‍ കുട്ടിച്ചാത്തന്‍റെ' സംവിധായകന്‍ ജിജോ പുന്നൂസാണ് സിനിമയ്‌ക്ക് വേണ്ടി തിരക്കഥ ഒരുക്കിയിരിക്കുന്നത്.
Also Read:മോഹന്‍ലാല്‍ അഭ്യാസം തികഞ്ഞ സംവിധായകന്‍, ബറോസ് നല്ലൊരു സിനിമയായിരിക്കും : ടികെ രാജീവ് കുമാര്‍
വളരെ പ്രത്യേകതകളോടുകൂടിയാണ് 'ബറോസ്' പ്രേക്ഷകര്‍ക്ക് മുന്‍പിലെത്തുക. യഥാർഥ കഥാപാത്രങ്ങൾക്കൊപ്പം, ആനിമേറ്റഡ് കഥാപാത്രങ്ങളും സിനിമയില്‍ ഉണ്ടാകും എന്നതാണ് 'ബറോസി'ന്‍റെ പ്രത്യേകതകളില്‍ ഒന്ന്. ഒരേസമയം 'ബറോസ്' 60ലധികം രാജ്യങ്ങളിൽ റിലീസ് ചെയ്യുമെന്നാണ് സൂചന.
2019ലായിരുന്നു 'ബറോസി'ന്‍റെ ഔദ്യോഗിക പ്രഖ്യാപനം. 2021 മാര്‍ച്ച് 24നായിരുന്നു സിനിമയുടെ ഒഫീഷ്യല്‍ ലോഞ്ച്. ഫാന്‍റസി സ്വഭാവമുള്ള 'ബറോസ്' ത്രീഡിയിലാണ് ഒരുക്കിയിരിക്കുന്നത്. 400 വർഷമായി വാസ്‌കോഡ ഗാമയുടെ അമൂല്യ നിധി സംരക്ഷിക്കുന്ന 'ബറോസ്', അതിന്‍റെ യഥാര്‍ഥ അവകാശിക്ക് നിധി കൈമാറാന്‍ ശ്രമിക്കുന്നതാണ് സിനിമയുടെ പശ്ചാത്തലം.
മോഹന്‍ലാല്‍ സംവിധാനം ചെയ്യുന്ന ഈ ഫാന്‍റസി ഡ്രാമയില്‍ നായകനായി ടൈറ്റില്‍ റോളില്‍ എത്തുന്നതും താരം തന്നെയാണ്. വാസ്‌കോഡ ഗാമയുടെ അമൂല്യ നിധി കാക്കുന്ന കാവല്‍ക്കാരനായ 'ബറോസി'ന്‍റെ കഥാപാത്രത്തെയാണ് മോഹന്‍ലാല്‍ അവതരിപ്പിക്കുന്നത്. പ്രേക്ഷകര്‍ ഇതുവരെ കണ്ടിട്ടില്ലാത്ത വേറിട്ട ഗെറ്റപ്പിലാണ് സിനിമയില്‍ മോഹന്‍ലാല്‍ പ്രത്യക്ഷപ്പെടുന്നത്.
Also Read:Barroz | ഞെട്ടിച്ച് 'ബറോസ്' പ്രീ വിഷ്വലൈസേഷന്‍ വീഡിയോ ; അണിയറയിലൊരുങ്ങുന്നത് ത്രസിപ്പിക്കുന്ന ആക്ഷൻ രംഗങ്ങളും
കൂടാതെ ഗുരു സോമസുന്ദരം, പ്രതാപ് പോത്തന്‍, മായ, സ്‌പാനിഷ് താരങ്ങളായ റാഫേൽ അമർഗോ, സീസര്‍ ലോറെന്‍റെ റാട്ടണ്‍, പാസ് വേഗ തുടങ്ങിയവരും സുപ്രധാന വേഷങ്ങളില്‍ എത്തുന്നുണ്ട്. വാസ്‌കോഡ ഗാമയുടെ വേഷത്തില്‍ റാഫേല്‍ അമര്‍ഗോയും ഭാര്യയായി പാസ് വേഗയുമാണ് വേഷമിടുക.
Also Read:ആരാധകർക്ക് പുതുവർഷ സമ്മാനവുമായി മോഹൻലാൽ ; ബറോസ് ഫസ്റ്റ് ലുക്ക് പുറത്ത്
ഇന്ത്യയ്ക്കകത്തും പുറത്തുമുള്ള നിരവധി അഭിനേതാക്കളും സാങ്കേതിക വിദഗ്‌ധരുമാണ് 'ബറോസി'ന്‍റെ ഭാഗമാകുന്നത്. അതുകൊണ്ടുതന്നെ സിനിമയെ കുറിച്ചുള്ള ആരാധകരുടെ പ്രതീക്ഷകളും വാനോളമാണ്. ഹോളിവുഡ് സംഗീത സംവിധായകന്‍ മാര്‍ക്ക് കിലിയന്‍ ആണ് ബറോസിന് വേണ്ടി പശ്ചാത്തല സംഗീതം ഒരുക്കുക. സംവിധായകന്‍ ടികെ രാജീവ് കുമാര്‍ ആണ് സിനിമയുടെ സഹ സംവിധാനം. ആശിര്‍വാദ് സിനിമാസിന്‍റെ ബാനറില്‍ ആന്‍റണി പെരുമ്പാവൂര്‍ ആണ് നിര്‍മാണം. സന്തോഷ് ശിവൻ ഛായാഗ്രഹണവും നിര്‍വഹിക്കുന്നു.
