പിറന്നാളാഘോഷമെന്ന് പെണ്‍കുട്ടിയെ കബളിപ്പിച്ചു ; 12 വയസുകാരിയെ 35കാരന് വിവാഹം ചെയ്‌തുനൽകി മാതാപിതാക്കൾ

വിവാഹമാണെന്ന് മനസിലാക്കിയ പെൺകുട്ടി നാട്ടുകാരെയും ഐസിഡിഎസ് ജീവനക്കാരെയും വിവരം അറിയിച്ചു

തെലങ്കാന : തെലങ്കാനയിൽ 12 വയസുള്ള പെൺകുട്ടിയെ 35കാരന് വിവാഹം ചെയ്‌തുകൊടുത്ത് മാതാപിതാക്കൾ. രംഗറെഡ്ഡി ജില്ലയിലെ കേശംപേട്ട് മണ്ഡലത്തിലെ പാപ്പിറെഡ്ഡി ഗുഡ ഗ്രാമത്തിലാണ് നടുക്കുന്ന സംഭവം. നാടോടികളായ എല്ലമ്മയുടെയും ഗോപാലിന്‍റെയും മകളാണ് പെൺകുട്ടി.

ഫാറൂഖ് നഗറിലെ വെലിജർല ഗ്രാമത്തിലെ താമസക്കാരനായ 35 വയസുകാരനാണ് പെൺകുട്ടിയെ വിവാഹം ചെയ്‌തത്. പെൺകുട്ടിയോട് പിറന്നാൾ ആഘോഷമെന്ന് പറഞ്ഞാണ് മാതാപിതാക്കൾ വിവാഹം നടത്തിയത്. എന്നാൽ, വിവാഹ വിവരം മനസിലാക്കിയ പെൺകുട്ടി നാട്ടുകാരെയും ഐസിഡിഎസ് ജീവനക്കാരെയും വിവരം അറിയിച്ചു.

സംഭവത്തെ തുടർന്ന് പെൺകുട്ടി ബന്ധുക്കളോടൊപ്പം പോയി. ഇതേതുടർന്ന് മാതാപിതാക്കൾ ബന്ധുക്കളുമായി വാക്കുതർക്കത്തിലേർപ്പെട്ടു. ശേഷം പെൺകുട്ടിയെ തിരികെ കൊണ്ടുപോകുകയും ചെയ്‌തു.

വിവരമറിഞ്ഞെത്തിയ ഐസിഡിഎസ് ഉദ്യോഗസ്ഥൻ പൊലീസിനെ സമീപിച്ചു. തുടര്‍ന്ന് പൊലീസെത്തി പെൺകുട്ടിയെ ബാലികാസംരക്ഷണ കേന്ദ്രത്തിലാക്കി. സംഭവത്തിൽ കേഷാംപേട്ട് പൊലീസ് കേസെടുത്ത് അന്വേഷണമാരംഭിച്ചു.