ന്യൂഡൽഹി : മണിപ്പൂരിലെ വംശീയ കലാപം ചർച്ച ചെയ്യാൻ കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തിൽ ഇന്ന് സർവകക്ഷി യോഗം ചേരും. ഉച്ചകഴിഞ്ഞ് മൂന്ന് മണിക്ക് ഡൽഹിയിലാണ് യോഗം ചേരുക. വടക്കുകിഴക്കൻ സംസ്ഥാനത്ത് നടക്കുന്ന അക്രമങ്ങളിൽ പ്രധാനമന്ത്രി നരേന്ദ്ര മോദിയുടെ മൗനത്തെ കുറിച്ച് പ്രതിപക്ഷ പാർട്ടികൾ വിമർശനങ്ങൾ ഉന്നയിച്ച സാഹചര്യത്തിലാണ് യോഗം ചേരുന്നത്.
മേയ് 3 ന് മലയോര ജില്ലകളിൽ ഗോത്രവർഗ ഐക്യദാർഢ്യ മാർച്ച് സംഘടിപ്പിച്ചതിന് ശേഷം മണിപ്പൂരിൽ നടന്ന അക്രമാസക്തമായ ഏറ്റുമുട്ടലിൽ 120 പേരാണ് മരിച്ചത്. 3,000 പേർക്ക് പരിക്കേറ്റു. കോൺഗ്രസ് മുൻ അധ്യക്ഷ സോണിയ ഗാന്ധി മണിപ്പൂരിലെ അക്രമത്തെ അപലപിച്ചു.
കലാപം തുടരുന്ന സാഹചര്യത്തിൽ വിഷയത്തിൽ ഇടപെടാനും സംഘർഷത്തിന് പരിഹാരം കാണണമെന്നും കേന്ദ്രസർക്കാരിനോട് ആവശ്യപ്പെട്ട് മണിപ്പൂരിലെ പ്രദേശവാസികളും രംഗത്തെത്തി. സംഘർഷം അവസാനിപ്പിക്കാൻ ആവശ്യമായ നടപടികൾ സ്വീകരിക്കാത്തതിന്‍റെ പേരിൽ സംസ്ഥാനത്തെ ഭാരതീയ ജനത പാർട്ടിയുടെ നേതൃത്വത്തിലുള്ള സഖ്യം പ്രതിസന്ധിയിലാണ്. കേന്ദ്രസർക്കാരിനോ സംസ്ഥാന സർക്കാരിനോ മണിപ്പൂരിൽ ക്രമസമാധാനം പുനഃസ്ഥാപിക്കാൻ കഴിഞ്ഞിട്ടില്ല എന്നാരോപിച്ച് പ്രതിപക്ഷം കടുത്ത വിമർശനങ്ങളാണ് ബിജെപിക്കെതിരെ ഉന്നയിക്കുന്നത്.
അക്രമം തുടരുന്ന സാഹചര്യത്തിൽ അമിത് ഷാ കുറച്ച് ദിവസങ്ങൾക്ക് മുൻപ് മണിപ്പൂരിലെത്തി മുഖ്യമന്ത്രി എൻ ബിരേൻ സിങ്ങുമായും ഉന്നത ഉദ്യോഗസ്ഥരുമായും ഇംഫാലിൽ വച്ച് കൂടിക്കാഴ്‌ച നടത്തിയിരുന്നു. പ്രധാനമന്ത്രി മോദിയുടെ അമേരിക്കൻ സന്ദർശന വേളയിൽ സംഘർഷം പരിഹരിക്കണമെന്ന് ആവശ്യപ്പെട്ട് യുഎസിലെ മെയ്തേയിയും കുക്കി നിവാസികളും പ്രകടനങ്ങൾ നടത്തിയിരുന്നു.