സെൽഫി വീഡിയോ എടുത്ത് യുവാവിന്‍റെ ആത്മഹത്യ ; ഭാര്യയെ തട്ടിക്കൊണ്ടു പോയെന്ന് വീഡിയോയില്‍ യുവാവ്

ഭാര്യ ജോലി ചെയ്യുന്ന തുണിക്കടയിലെ മാനേജര്‍ അവളെ തട്ടിക്കൊണ്ട് പോയെന്നും മാനേജര്‍ ഒന്നും അറിയാത്ത പോലെ നടിക്കുകയാണെന്നും പൊലീസില്‍ പരാതി നല്‍കി അഞ്ച് മാസമായിട്ടും അവഗണിക്കുകയാണെന്നും യുവാവ് വീഡിയോയില്‍ പറയുന്നു

നരസിപട്ടണം (ആന്ധ്രാപ്രദേശ്): ഭാര്യയെ തട്ടിക്കൊണ്ടു പോയതായി കാണിച്ച് നല്‍കിയ പരാതി പൊലീസ് അവഗണിച്ചതില്‍ മനം നൊന്ത് യുവാവ് സെൽഫി വീഡിയോ എടുത്ത് ആത്മഹത്യ ചെയ്‌തു. അനകപ്പള്ളി നരസിപട്ടണം കോതവീഥിയിലെ കാമിറെഡി ദുർഗപ്രസാദ് (35) ആണ് ആത്മഹത്യ ചെയ്‌തത്. നരസിപട്ടണത്തെ തുണിക്കടയില്‍ ജോലി ചെയ്യുകയായിരുന്ന തന്‍റെ ഭാര്യയെ കടയുടെ മാനേജര്‍ തട്ടിക്കൊണ്ട് പോയെന്നും പൊലീസില്‍ പരാതിപ്പെട്ടപ്പോള്‍ പൊലീസ് അവഗണിച്ചുവെന്നും ദുര്‍ഗപ്രസാദ് സെല്‍ഫി വീഡിയോയില്‍ പറയുന്നു.

തുണിക്കട മാനേജറും മറ്റു രണ്ടുപേരും കാരണമാണ് ആത്മഹത്യ ചെയ്യുന്നതെന്നും തനിക്ക് നീതി ലഭിക്കണമെന്നും വീഡിയോയില്‍ പറയുന്നുണ്ട്. പത്ത് വർഷം മുമ്പ് ദുർഗപ്രസാദ് ഒരു യുവതിയെ വിവാഹം കഴിച്ചിരുന്നു. എന്നാല്‍ അവര്‍ ദുര്‍ഗപ്രസാദിനെ ഉപേക്ഷിക്കുകയായിരുന്നു.

തുടര്‍ന്ന് തുണിക്കടയില്‍ ജോലി ചെയ്യുന്ന മറ്റൊരു യുവതിയെ വിവാഹം കഴിച്ചു. ദുര്‍ഗപ്രസാദിന്‍റെ മദ്യപാനത്തെ തുടര്‍ന്ന് ഭാര്യ പൊലീസില്‍ പരാതി നല്‍കിയുരുന്നു. അന്ന് പൊലീസ് ഇരുവര്‍ക്കും കൗണ്‍സിലിങ് നല്‍കി പ്രശ്‌നം ഒത്തുതീര്‍പ്പാക്കി.

വീണ്ടും വഴക്കുണ്ടായതോടെ യുവതി കഴിഞ്ഞ ഏപ്രിലിൽ പാടേരുവിലുള്ള സഹോദരന്‍റെ വീട്ടിലേക്ക് പോയി. ഇവര്‍ പിന്നീട് തിരിച്ചു വന്നില്ല. ഇതേ തുടര്‍ന്നാണ് ഭാര്യയെ തട്ടിക്കൊണ്ടുപോയെന്ന് കാണിച്ച് ദുര്‍ഗപ്രസാദ് പരാതി നല്‍കിയത്.

മദ്യപാനവും ഭാര്യയെ കാണാത്തതിലുള്ള മനോവിഷമവുമാണ് ദുര്‍ഗപ്രസാദ് ആത്മഹത്യ ചെയ്യാന്‍ കാരണമെന്ന് അദ്ദേഹത്തിന്‍റെ അമ്മ സത്യവതി പറഞ്ഞു.