ന്യൂഡല്‍ഹി : ഭരണഘടന ജീവിക്കാനുള്ള ഉപാധിയാണെന്നും അതിന്‍റെ ആത്മാവ് എല്ലായ്‌പ്പോഴും അതേപടി നിലനിൽക്കുമെന്നുമുള്ള ഡോ. ബിആര്‍ അംബേദ്‌കറിന്‍റെ വാക്കുകള്‍ ഉദ്ധരിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ. ഭരണഘടന ദിനത്തില്‍ (നവംബര്‍ 26) പങ്കുവച്ച ട്വീറ്റിലാണ് ഖാര്‍ഗെ ഭരണഘടനയെയും അതിന്‍റെ നിര്‍മാണത്തിന് നേതൃത്വം നല്‍കിയ മഹാന്‍മാരെയും കുറിച്ച് പറഞ്ഞത്. 'ഭരണഘടന അഭിഭാഷകരുടെ ഒരു രേഖ മാത്രമല്ല, അത് ജീവിക്കാനുള്ള ഉപാധിയാണ്, അതിന്‍റെ ആത്മാവ് എപ്പോഴും അതേപടി നിലനിൽക്കും.
ഭരണഘടന നിർമാണ സഭയിലെ എല്ലാ മഹാന്‍മാരായ നേതാക്കളുടെയും വിലപ്പെട്ട സംഭാവനകൾ ഞങ്ങൾ ഓർക്കുന്നു. രാജ്യത്തെ എല്ലാ ജനങ്ങള്‍ക്കും ഭരണഘടന ദിനത്തിൽ ആശംസകൾ' - ഖാര്‍ഗെ ട്വിറ്ററില്‍ കുറിച്ചു. അതേസമയം ഭരണഘടനയിലെ ഓരോ വാക്കും ഉയര്‍ത്തപ്പെടുന്നതുവരെ മുന്നോട്ടുപോകുമെന്ന് കോണ്‍ഗ്രസ് നേതാവ് രാഹുല്‍ ഗാന്ധിയും ട്വീറ്റ് ചെയ്‌തു.