മുംബൈ: മഹാരാഷ്‌ട്രയില്‍ നിന്ന് ഗുജറാത്തികളെയും, രാജസ്ഥാനികളെയും പുറത്താക്കിയാല്‍ സംസ്ഥാനത്തിന്‍റെ സമ്പദ് വ്യവസ്ഥ തകരുമെന്ന ഗവര്‍ണര്‍ ഭഗത് സിങ് കോഷിയാരിയുടെ പരാമര്‍ശം വിവാദത്തില്‍. അന്ധേരിയില്‍ നടന്ന ഒരു പരിപാടിക്കിടെയാണ് ഗവര്‍ണര്‍ വിവാദ പ്രസ്‌താവന നടത്തിയത്. കോഷിയാരിയുടെ പ്രസ്‌താവനയ്‌ക്കെതിരെ കടുത്ത വിമര്‍ശനമാണ് സംസ്ഥാനത്തിന്‍റെ പല ഭാഗങ്ങളില്‍ നിന്നും ഉയരുന്നത്.
ഗുജറാത്തികളെയും രാജസ്ഥാനികളെയും മഹാരാഷ്‌ട്രയിൽ നിന്ന്, പ്രത്യേകിച്ച് മുംബൈ, താനെ എന്നിവിടങ്ങളിൽ നിന്ന് പുറത്താക്കിയാല്‍ ഇവിടെ പണമുണ്ടാകില്ല. സംസ്ഥാനത്തിന്‍റെ സാമ്പത്തിക ശേഷി തന്നെ തകരും. പിന്നെ സാമ്പത്തിക തലസ്ഥാനമല്ലാതെ മുംബൈ മാറും എന്നുമായിരുന്നു മഹാരാഷ്‌ട്ര ഗവര്‍ണറുടെ പ്രസംഗത്തിലെ വിവാദ പരാമര്‍ശം.