മുംബൈ: പ്രശസ്‌ത സിനിമ സീരിയല്‍ താരവും സംവിധായകനുമായ ഗുഫി പേന്തല്‍ എന്ന സരബ്‌ജീത് സിങ് അന്തരിച്ചു. വാർദ്ധക്യ സഹജമായ അസുഖങ്ങളെ തുടര്‍ന്നായിരുന്നു അന്ത്യം. 78 വയസ്സായിരുന്നു. തിങ്കളാഴ്‌ച വൈകിട്ട് ശവസംസ്‌കാരം നടക്കും.
ഗുഫിയുടെ മകനാണ് നടന്‍റെ വിയോഗ വാർത്ത സോഷ്യല്‍ മീഡിയയിലൂടെ അറിയിച്ചത്. മകന്‍ ഇന്‍സ്‌റ്റഗ്രാം സ്‌റ്റോറിയിലൂടെയാണ് ഈ ദു:ഖവാര്‍ത്ത പങ്കുവച്ചത്. 'സമാധാനത്തോടെ അന്ത്യ വിശ്രമം കൊള്ളുക. അഗാധമായ ദുഃഖത്തോടെ ഞങ്ങളുടെ പിതാവ് മിസ്‌റ്റര്‍ ഗുഫി പേന്തലിന്‍റെ (ശകുനി മാമ) വിയോഗം ഞങ്ങൾ അറിയിക്കുന്നു. ഇന്ന് രാവിലെ അദ്ദേഹം സമാധാനപരമായി അന്തരിച്ചു. മരിക്കുമ്പോള്‍ കുടുംബാംഗങ്ങളും അടുത്തുണ്ടായിരുന്നു.' -ഗുഫി പേന്തലിന്‍റെ ചിത്രം പങ്കുവച്ച് കൊണ്ടാണ് മകന്‍ ഇന്‍സ്‌റ്റഗ്രാമിലൂടെ ഇക്കാര്യം അറിയിച്ചത്.
ഏറെ നാളായി അസുഖ ബാധിതനായിരുന്ന ഗുഫി പേന്തലിന്‍റെ ആരോഗ്യനില വഷളായതിനെ തുടർന്ന് മേയ് 31ന് അദ്ദേഹത്തെ മുംബൈ അന്ധേരിയിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. തന്‍റെ അമ്മാവൻ ഗുഫി ഗുരുതരാവസ്ഥയിലാണെന്നും ഹൃദയ, വൃക്ക സംബന്ധമായ പ്രശ്‌നങ്ങൾക്ക് അന്ധേരിയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയായിരുന്നെന്നും നടന്‍റെ അനന്തരവനും നടനുമായ ഹിറ്റെൻ പെയിന്‍റൽ കഴിഞ്ഞ ആഴ്‌ച മാധ്യമങ്ങളോട് പറഞ്ഞിരുന്നു.
പ്രശസ്‌ത ഹാസ്യ നടൻ കൻവർജിത് സിങ് പേന്തലിന്‍റെ മൂത്ത സഹോരന്‍ കൂടിയാണ് ഗുഫി പേന്തല്‍. ദൂരദര്‍ശനില്‍ സംപ്രേക്ഷണം ചെയ്‌ത 'മഹാഭാരതം' (1988-1990) എന്ന മെഗാ ടെലിസീരിയലിലെ കൗശലക്കാരനായ ശകുനി മാമയുടെ വേഷം അവതരിപ്പിച്ചാണ് ഗുഫി പേന്തല്‍ പ്രേക്ഷകശ്രദ്ധ നേടുന്നത്. അന്തരിച്ച പ്രമുഖ സംവിധായകനും നിര്‍മാതാവുമായ ബി.ആര്‍ ചോപ്ര ആയിരുന്നു 'മഹാഭാരതം' സീരിയലിന്‍റെ സംവിധായകന്‍.