മധ്യപ്രദേശില്‍ ട്രക്ക് നിയന്ത്രണം വിട്ട് രണ്ട് ബസുകളിലിടിച്ചു; 14 പേര്‍ മരിച്ചു, 50ഓളം പേര്‍ക്ക് പരിക്ക്

മധ്യപ്രദേശ് സിധി ജില്ലയില്‍ രേവ-സത്‌ന അതിർത്തിയിലെ മൊഹാനിയ ടണലിന് സമീപത്തായാണ് അപകടം.

സിധി: കേന്ദ്ര ആഭ്യന്തര മന്ത്രി അമിത് ഷാ അഭിസംബോധന ചെയ്‌ത പരിപാടിയില്‍ പങ്കെടുത്ത് മടങ്ങിയവരുടെ ബസുകളില്‍ നിയന്ത്രണം വിട്ട ട്രക്ക് ഇടിച്ച് 14 പേര്‍ മരിച്ചു. രേവ-സത്‌ന അതിർത്തിയിലെ മൊഹാനിയ ടണലിന് സമീപം ഇന്നലെ രാത്രി ഒമ്പത് മണിയോടെയാണ് അപകടം. ട്രക്ക് രണ്ട് ബസിലിടിച്ചുണ്ടായ അപകടത്തില്‍ 50ഓളം പേര്‍ക്ക് പരിക്കേറ്റിട്ടുണ്ടെന്നാണ് സൂചന.

ട്രക്കിന്‍റെ ടയര്‍ പൊട്ടിയതാണ് അപകടകാരണമെന്ന് അധികൃതര്‍ വ്യക്തമാക്കി. അമിത വേഗതയിലെത്തിയ ട്രക്ക് നിര്‍ത്തിയിട്ടിരുന്ന രണ്ട് ബസുകളുടെ പിന്‍വശത്ത് വന്നിടിക്കുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. ഇടിയുടെ ആഘാതത്തില്‍ ഒരു ബസ് റോഡരികിലുള്ള കുഴിയിലേക്ക് മറിഞ്ഞു.

പരിക്കേറ്റവരില്‍ 9 പേരുടെ നില ഗുരുതരമാണെന്നാണ് റിപ്പോര്‍ട്ട്. ഇവരില്‍ ഭൂരിഭാഗം പേരെയും രേവ മെഡിക്കൽ കോളേജ്, സിധി ജില്ല ആശുപത്രി എന്നിവിടങ്ങളിലാണ് പ്രവേശിപ്പിച്ചിരിക്കുന്നത്. അപകടത്തിന് പിന്നാലെ മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ സംഭവസ്ഥലം സന്ദർശിച്ചിരുന്നു.

മുഖ്യമന്ത്രിയെ കൂടാതെ ജില്ലാ കലക്‌ടർ സാകേത് മാളവ്യ, ഉന്നത പൊലീസ് ഉദ്യോഗസ്ഥര്‍ എന്നിവരും സ്ഥലത്തെത്തിയിരുന്നു. അപകടത്തില്‍ മരിച്ചവരുടെ കുടുംബങ്ങള്‍ക്ക് 50 ലക്ഷം രൂപയും പരിക്കേറ്റവർക്ക് 5 ലക്ഷം രൂപയും നഷ്‌ടപരിഹാരം നല്‍കുമെന്ന് മധ്യപ്രദേശ് മുന്‍ മുഖ്യമന്ത്രി കമല്‍നാഥ് അറിയിച്ചു.