ന്യൂഡല്‍ഹി: അഴിമതി, കാപട്യം, സ്വേച്ഛാധിപതി, അരാജകവാദി തുടങ്ങിയ വാക്കുകള്‍ക്ക് ഇനി പാര്‍ലെന്‍റില്‍ വിലക്ക്. ജൂലൈ 18ന് പാര്‍ലമെന്‍റിന്‍റെ വര്‍ഷകാല സമ്മേളനം ആരംഭിക്കുന്നതിന് മുന്നോടിയായി ലോക്‌സഭ സെക്രട്ടേറിയറ്റ് പുറത്തിറക്കിയ ബുക്ക്‌ലെറ്റിലാണ് ഇത് സംബന്ധിച്ച് നിര്‍ദേശമുള്ളത്. വിലക്ക് ഏര്‍പ്പെടുത്തിയ വാക്കുകള്‍ ഇരു സഭകളിലും ചർച്ചകൾക്കിടയില്‍ ഉപയോഗിച്ചാൽ സഭാരേഖകളില്‍ നിന്ന് നീക്കം ചെയ്യും.
'ജുംലജീവി'(വാഗ്ദാനങ്ങൾ നടത്തുന്നയാൾ), 'ബാൽബുദ്ധി', 'കൊവിഡ് സ്‌പ്രെഡര്‍', 'സ്‌നൂപ്‌ഗേറ്റ്' തുടങ്ങിയ ചില പദങ്ങളും സാധാരണയായി ഉപയോഗിക്കുന്ന ലജ്ജിക്കുന്നു, ദുരുപയോഗം ചെയ്യപ്പെട്ടു, വഞ്ചിക്കപ്പെട്ടു തുടങ്ങിയ പ്രയോഗങ്ങളും പാര്‍ലമെന്‍റില്‍ ഉപയോഗിക്കുന്നതിന് വിലക്ക് ഏര്‍പ്പെടുത്തിയിട്ടുണ്ട്. അഴിമതി, നാടകം, അയോഗ്യർ എന്നിവ ഇനി മുതൽ ലോക്‌സഭയിലും രാജ്യസഭയിലും അൺപാർലമെന്‍ററി വാക്കായി പരിഗണിക്കും. വാക്കുകളും പ്രയോഗങ്ങളും നീക്കം ചെയ്യുന്നതിൽ അന്തിമ തീരുമാനമെടുക്കുക രാജ്യസഭ ചെയർമാനും ലോക്‌സഭ സ്‌പീക്കറുമായിരിക്കും.