ലഖിംപുർ ഖേരി : ലഖിംപുർ ഖേരി ജില്ലയിലെ എട്ട് മണ്ഡലങ്ങളിലും ബിജെപി സ്ഥാനാര്‍ഥികള്‍ക്ക് ലീഡ്. നിഖാസനിലെ ബിജെപി സ്ഥാനാര്‍ഥി ശശാങ്ക് വർമ 53,785 വോട്ടുകൾക്കാണ് ലീഡ് ചെയ്യുന്നുത്. 33,810 വോട്ടുകള്‍ നേടിയ സമാജ്‌വാദി പാർട്ടിയുടെ (എസ്‌പി) ആർഎസ് കുശ്‌വാഹാണ് രണ്ടാം സ്ഥാനത്തുള്ളത്.
ഉച്ചയ്ക്ക് 1.15 വരെയുള്ള കണക്കാണിത്. ബിജെപിക്ക് 2000 വോട്ടിന് താഴെമാത്രം ലീഡുള്ള കസ്തയിൽ മാത്രമാണ് എസ്‌പി വെല്ലുവിളിയുയര്‍ത്തുന്നത്. തെരഞ്ഞെടുപ്പിന് മുന്നോടിയായി ബിജെപിക്കെതിരെ പ്രതിപക്ഷ പാർട്ടികൾ ഉപയോഗിച്ച പ്രധാന വിമര്‍ശനങ്ങളിലൊന്നായിരുന്നു ലഖിംപൂർ ഖേരി ആക്രമണം. കഴിഞ്ഞ ഒക്ടോബർ മൂന്നിന് കര്‍ഷക സമരത്തിനുനേരെയുണ്ടായ ആക്രമണത്തെ തുടര്‍ന്ന് നാല് കർഷകർ ഉൾപ്പടെ എട്ട് പേര്‍ കൊല്ലപ്പെട്ടിരുന്നു.