ഡെറാഡൂൺ: 'ഹർ ഹർ മഹാദേവ്', 'ഗംഗാ മൈയാ കീ ജയ്' എന്നീ മന്ത്രോച്ചാരണങ്ങളാൽ മുഖരിതമാണ് കുംഭമേളയുമായി ബന്ധപ്പെട്ട രണ്ടാം ഷാഹി സ്‌നാനം നടക്കുന്ന ഉത്തരാഖണ്ഡിലെ ഹരിദ്വാർ. നാലു വർഷത്തിൽ ഒരിക്കൽ നടക്കുന്ന കുംഭമേളയുടെ ഭാഗമായി വിവിധ അഖാരയിലുള്ള സന്യസികളാണ് തിങ്കളാഴ്‌ച ഹർ കീ പൗരിയിൽ സ്‌നാനത്തിനായി എത്തിയത്.
മാർച്ച് 11നാണ് ആദ്യ ഷാഹി സ്‌നാനം നടന്നത്. മൂന്നാമത്തെ ഷാഹി സ്‌നാനം ഏപ്രിൽ 14ന് നടക്കും. 13 അഖാടകളുടെ നേതൃത്വത്തിലാണ് സ്‌നാനം. നാസിക്, ഹരിദ്വാർ, പ്രയാഗ്‌രാജ്, ഉജ്ജൈൻ എന്നീ സ്ഥലങ്ങളിലായാണ് കുംഭമേള നടക്കുന്നത്. സാധാരണ നാലു മാസം നീണ്ടു നിൽക്കുന്ന കുംഭമേള കൊവിഡ് വ്യാപനത്തിന്‍റെ പശ്ചാതലത്തിൽ ഒരു മാസത്തേക്ക് ചുരുക്കിയിരിക്കുകയാണ്.