സോഷ്യല്‍ മീഡിയയില്‍ സജീവമാണ് ബോളിവുഡ് താരം കൃതി സനോണ്‍. തന്‍റെ സിനിമ വിശേഷങ്ങളും വ്യക്തി ജീവിത വിശേഷങ്ങളുമായി കൃതി സനോണ്‍ എല്ലായ്‌പ്പോഴും സോഷ്യല്‍ മീഡിയയില്‍ എത്താറുണ്ട്. ഇപ്പോഴിതാ താരം പങ്കുവച്ച പുതിയൊരു ചിത്രമാണിപ്പോള്‍ സോഷ്യല്‍ മീഡിയയില്‍ വൈറലാവുന്നത്.
തന്‍റെ വളർത്തു നായ്‌ക്കളായ ഡിസ്കോയുടെയും ഫിയോബിന്‍റെയും ചിത്രങ്ങളും വീഡിയോകളുമായി പലപ്പോഴും കൃതി സനോണ്‍ സോഷ്യല്‍ മീഡിയയില്‍ എത്താറുണ്ട്. തന്‍റെ വളര്‍ത്തു നായയുടെ പുതിയൊരു ചിത്രവുമായി ശനിയാഴ്‌ച ഇന്‍സ്‌റ്റഗ്രാമിലെത്തി ആരാധകര്‍ക്ക് വിസ്‌മയമായിരിക്കുകയാണ് കൃതി സനോണ്‍. ഫര്‍ബാള്‍ (രോമമുള്ള വളർത്തു മൃഗം) ഡിസ്കോയെ കെട്ടിപ്പിടിച്ചിരിക്കുന്ന ചിത്രമാണ് കൃതി പങ്കുവച്ചിരിക്കുന്നത്.
ചിത്രത്തിനൊപ്പം ഒരു അടിക്കുറിപ്പും താരം കുറിച്ചു. 'നമുക്ക് വേണ്ടത് സ്നേഹമാണ്! (ഒപ്പം ആലിംഗനങ്ങളും)' -ഇപ്രകാരമായിരുന്നു കൃതി സനോണ്‍ കുറിച്ചത്. ചിത്രം പങ്കുവച്ചതിന് പിന്നാലെ രസകരമായ കമന്‍റുകളുമായി ആരാധകര്‍ കമന്‍റ്‌ ബോക്‌സ്‌ നിറച്ചു. 'ഞാൻ ഇന്ന് കണ്ട ഏറ്റവും മനോഹരമായ കാര്യം!!!' (ഒരു ചുവന്ന ഹാര്‍ട്ട് ഇമോജിയോടെ) -ഒരു ആരാധകന്‍ കുറിച്ചു. 'അത്രയ്ക്ക് മനോഹരമായ ഒരു ചിത്രമാണിത്' -മറ്റൊരു ആരാധകന്‍ കമന്‍റ്‌ ചെയ്‌തു. 'ഈ ചിത്രം സമാധാനം നല്‍കുന്നു' -മറ്റൊരാള്‍ കുറിച്ചു.
അതേസമയം, 'ആദിപുരുഷി'ന്‍റെ റിലീസിനൊരുങ്ങുകയാണ് കൃതി സനോണ്‍. ഇതിഹാസമായ രാമായണത്തെ അടിസ്ഥാനമാക്കിയുള്ളതാണ്‌ ഓം റൗട്ട് സംവിധാനം ചെയ്‌ത 'ആദിപുരുഷ്'. ചിത്രത്തിൽ രാഘവായി പ്രഭാസും ജാനകിയായി കൃതി സനോനും ലക്ഷ്‌മണനായി സണ്ണി സിങ്ങുമാണ് വേഷമിടുന്നത്. സിനിമയില്‍ ലങ്കേഷിന്‍റെ വേഷത്തിലെത്തുന്നത് സെയ്‌ഫ്‌ അലി ഖാനാണ്.
ജൂൺ ആറിന് തിരുപ്പതിയിൽ വച്ച് 'ആദിപുരുഷി'ന്‍റെ ട്രെയിലര്‍ ലോഞ്ച് നടക്കും. മെഗാ ഇവന്‍റായാണ് ട്രെയിലര്‍ ലോഞ്ച് സംഘടിപ്പിച്ചിരിക്കുന്നത്. ചടങ്ങില്‍ 'ആദിപുരുഷി'ന്‍റെ രണ്ടാമത്തെ ട്രെയിലറാണ് 'ആദിപുരുഷ്' ടീം പുറത്തിറക്കുന്നത്. രണ്ട് മിനിറ്റ് 27 സെക്കൻഡ് ദൈര്‍ഘ്യമുള്ളതാണ് 'ആദിപുരുഷി'ന്‍റെ രണ്ടാമത്തെ ട്രെയിലര്‍.