ബന്ദിപോരയിലെ ഇതരസംസ്ഥാന തൊഴിലാളിയുടെ കൊലപാതകം: മൂന്ന് തീവ്രവാദികൾ അറസ്റ്റിൽ

സദുനാര സ്വദേശികളായ വസീം അക്രം, യവാർ റിയാസ്, മുസാമിൽ ഷെയ്ഖ് എന്നിവരെയാണ് ബന്ദിപോര പൊലീസ് അറസ്റ്റ് ചെയ്‌തത്.

ബന്ദിപോര (ജമ്മു കശ്‌മീർ):ബന്ദിപോരയിൽ ഇതരസംസ്ഥാന തൊഴിലാളിയെ കൊലപ്പെടുത്തിയ കേസിൽ മൂന്ന് തീവ്രവാദികൾ അറസ്റ്റിൽ. ബിഹാർ സ്വദേശിയായ മുഹമ്മദ് അമ്രസിന്‍റെ കൊലപാതകവുമായി ബന്ധപ്പെട്ട് സദുനാര സ്വദേശികളായ വസീം അക്രം, യവാർ റിയാസ്, മുസാമിൽ ഷെയ്ഖ് എന്നിവരാണ് അറസ്റ്റിലായത്. പ്രത്യേക അന്വേഷണസംഘം രൂപീകരിച്ച് നടത്തിയ തെരച്ചിലിലും പ്രദേശവാസികളെ ചോദ്യം ചെയ്‌തതിൽ നിന്ന് ലഭിച്ച സൂചനയുടെ അടിസ്ഥാനത്തിലുമാണ് മൂന്ന് തീവ്രവാദികളെ അറസ്റ്റ് ചെയ്‌തതെന്ന് ജില്ല പൊലീസ് സൂപ്രണ്ട് മുഹമ്മദ് സാഹിദ് പറഞ്ഞു.

പാകിസ്ഥാനിൽ നിന്ന് പ്രവർത്തിക്കുന്ന ലഷ്‌കറെ ത്വയിബ പരിശീലകനായ ബാബർ എന്നയാളുമായി ഇവർക്ക് ബന്ധമുണ്ട്. അറസ്റ്റിലായവരുടെ പക്കൽ നിന്നും ഒരു തോക്ക്, ഒരു മാഗസീൻ, നാല് വെടിയുണ്ടകൾ എന്നിവ കണ്ടെടുത്തു. ബന്ദിപോരയിലെ പ്രാദേശിക തീവ്രവാദത്തെ പുനരുജ്ജീവിപ്പിക്കാൻ ഭാവിയിൽ കൂടുതൽ ആക്രമണങ്ങൾ നടത്താൻ ഏതെങ്കിലും ഇതരസംസ്ഥാന തൊഴിലാളിയെ കൊലപ്പെടുത്താൻ ബാബർ നിർദേശിച്ചിരുന്നുവെന്നും മുഹമ്മദ് സാഹിബ് പറഞ്ഞു.

ഓഗസ്റ്റ് 11നും 12നുമിടയിലെ രാത്രിയിലാണ് അമ്രസ് തീവ്രവാദികളുടെ വെടിയേറ്റ് കൊല്ലപ്പെടുന്നത്. അന്വേഷണത്തിനിടെ സംശയാസ്‌പദമായ പലരെയും വിളിച്ചുവരുത്തി ചോദ്യം ചെയ്‌തു. ഒടുവിൽ അന്വേഷണം മൂന്ന് പേരിലേക്ക് എത്തുകയായിരുന്നു.

ഒരു സ്വദേശിയും വിദേശിയും ഉൾപ്പെടെ മൂന്ന് തീവ്രവാദികളെ ഇതുവരെ ബന്ദിപോര പൊലീസും സുരക്ഷ സേനയും ചേർന്ന് കൊലപ്പെടുത്തിയിട്ടുണ്ട്. ജില്ലയിൽ ഇതുവരെ ഒമ്പത് ഹൈബ്രിഡ് തീവ്രവാദികളെ അറസ്റ്റ് ചെയ്‌തതായും ആറ് തീവ്രവാദ ശ്രമങ്ങൾ തകർത്തതായും അദ്ദേഹം കൂട്ടിച്ചേർത്തു.