മുംബൈ: മുഹമ്മദ് നബിക്കെതിരായ അപകീര്‍ത്തി പരാമർശത്തില്‍ ബിജെപി നേതാവ് നുപുർ ശർമ്മയെ പിന്തുണച്ച് ബോളിവുഡ് താരം കങ്കണ റണാവത്ത്. നുപുരിന് അവരുടെ അഭിപ്രായങ്ങൾ പറയാൻ അർഹതയുണ്ട്. ഹിന്ദു ദൈവങ്ങളെ അപമാനിക്കുമ്പോൾ ഞങ്ങൾ കോടതിയിലാണ് പോകാറുള്ളത്. അതിനാൽ തന്നെ നുപുറിന്‍റെ അഭിപ്രായത്തിൽ തെറ്റുണ്ടെങ്കിൽ നിയമത്തിന്‍റെ വഴി സ്വീകരിക്കണമെന്നും കങ്കണ ഇൻസ്റ്റഗ്രാം സ്റ്റോറിയിലൂടെ പറഞ്ഞു.
'നുപുർ അവളുടെ അഭിപ്രായം പറഞ്ഞതിന്‍റെ പേരിൽ ധാരാളം ഭീഷണികൾ അവളെ ലക്ഷ്യമിടുന്നതായി ഞാൻ കാണുന്നു. ഹിന്ദു ദൈവങ്ങളെ അപമാനിക്കുമ്പോൾ ഞങ്ങൾ കോടതിയിലാണ് പോകാറുള്ളത്. അതിനാൽ തന്നെ നുപുറിന്‍റെ അഭിപ്രായത്തിൽ തെറ്റുണ്ടെങ്കിൽ നിയമത്തിന്‍റെ വഴി സ്വീകരിക്കുക. ആരും സ്വയം ഡോൺ കളിക്കേണ്ട ആവശ്യമില്ല', കങ്കണ പറഞ്ഞു.
'ഇത് അഫ്‌ഗാനിസ്ഥാനല്ല, ജനാധിപത്യം എന്ന പ്രക്രിയയിലൂടെ തെരഞ്ഞെടുക്കപ്പെട്ട ശരിയായി പ്രവർത്തിക്കുന്ന ഒരു ഗവൺമെന്‍റാണ് നമുക്കുള്ളത്. മറക്കുന്നവർക്ക് ഇത് ഒരു ഓർമ്മപ്പെടുത്തൽ മാത്രമാണ്.' കങ്കണ കൂട്ടിച്ചേർത്തു. അതിനിടെ നുപുർ ശർമ്മക്ക് വധ ഭീഷണി സന്ദേശവും ലഭിച്ചിരുന്നു. തനിക്ക് ഭീഷണിയുണ്ടെന്നും പരാമർശങ്ങളുടെ പേരിൽ താൻ പീഡിപ്പിക്കപ്പെടുന്നുവെന്നും നുപുർ ശർമ്മ ആരോപിച്ചതിന് പിന്നാലെ നേതാവിനും കുടുംബത്തിനും ഡൽഹി പൊലീസ് സുരക്ഷ ശക്‌തമാക്കിയിട്ടുണ്ട്.