ന്യൂഡൽഹി: കോൺഗ്രസ് രാജ്യസഭ എംപി ധീരജ് സാഹുവിന് ബന്ധമുള്ള സ്ഥാപനങ്ങളിൽ നടന്ന ഇൻകം ടാക്‌സ് റെയ്‌ഡിൽ 300 കോടിയോളം രൂപ കണ്ടുകെട്ടിയ സംഭവത്തിൽ കോൺഗ്രസിനെതിരെ രൂക്ഷ വിമർശനവുമായി ബിജെപി അധ്യക്ഷൻ ജെപി നദ്ദ (JP Nadda about Dhiraj Sahu IT Raids- Says Rahul Gandhi Will Have To Answer). വിഷയത്തിൽ രാഹുൽ ഗാന്ധി മറുപടി പറയണമെന്ന് നദ്ദ ആവശ്യപ്പെട്ടു. അഴിമതിയുടെ ഉറപ്പ് കോൺഗ്രസ് ആണെങ്കിൽ മോദിജി അഴിമതിക്കെതിരെയുള്ള നടപടിയുടെ ഉറപ്പാണെന്നും പൊതുജനങ്ങളിൽ നിന്ന് കൊള്ളയടിക്കുന്ന ഓരോ പൈസയും തിരികെ നൽകേണ്ടിവരുമെന്നും നദ്ദ തൻ്റെ എക്‌സിലൂടെ പ്രതികരിച്ചു.
'സഹോദരാ, നിങ്ങളും നിങ്ങളുടെ നേതാവ് രാഹുൽ ഗാന്ധിയും ഉത്തരം പറയേണ്ടിവരും. ഇത് പുതിയ ഇന്ത്യയാണ്, ഇവിടെ രാജകുടുംബത്തിന്‍റെ പേരിൽ ജനങ്ങളെ ചൂഷണം ചെയ്യാൻ അനുവദിക്കില്ല. നിങ്ങൾ ഓടി ക്ഷീണിക്കും പക്ഷേ നിയമം നിങ്ങളെ വിടില്ല. അഴിമതിയുടെ ഉറപ്പ് കോൺഗ്രസ് ആണെങ്കിൽ മോദിജി അഴിമതിക്കെതിരെയുള്ള നടപടിയുടെ ഉറപ്പാണ്. പൊതുജനങ്ങളിൽ നിന്ന് കൊള്ളയടിക്കുന്ന ഓരോ പൈസയും തിരികെ നൽകേണ്ടിവരും.' - ജെപി നദ്ദ എക്‌സിൽ കുറിച്ചു.
നേരത്തെ കോൺഗ്രസിനെ പരിഹസിച്ച് പ്രധാനമന്ത്രി നരേന്ദ്ര മോദിയും (Narendra Modi) രംഗത്തുവന്നിരുന്നു. പൊതുജനങ്ങളിൽ നിന്ന് എന്ത് കൊള്ളയടിച്ചാലും ഓരോ പൈസയും തിരികെ നൽകേണ്ടിവരുമെന്ന് പ്രധാനമന്ത്രി എക്‌സിൽ കുറിച്ചു. 'രാജ്യത്തെ ജനങ്ങള്‍ ഈ കറൻസി നോട്ടുകളുടെ കൂമ്പാരങ്ങൾ നോക്കണം, എന്നിട്ട് അവരുടെ (കോൺഗ്രസ്) നേതാക്കളുടെ സത്യസന്ധതയെക്കുറിച്ചുള്ള പ്രസംഗങ്ങൾ കേൾക്കണം. പൊതുജനങ്ങളിൽ നിന്ന് എന്ത് കൊള്ളയടിച്ചാലും ഓരോ പൈസയും തിരികെ നൽകേണ്ടിവരും, ഇതാണ് മോദിയുടെ ഉറപ്പ്' - മോദി എക്‌സിൽ കുറിച്ചു.