ബാർപേട്ട:പൊലീസുകാരിയെ മർദ്ദിച്ചുവെന്ന കേസിൽ ദലിത് നേതാവും എംഎല്‍എയുമായ ജിഗ്നേഷ് മേവാനിക്ക് ജാമ്യം. അസമിലെ ബാർപേട്ട ജില്ല സെഷൻസ് ജഡ്‌ജി പരേഷ് ചക്രവർത്തിയാണ് ജാമ്യം അനുവദിച്ചത്. കേസില്‍ വ്യാഴാഴ്ച വാദം കേട്ട കോടതി കേസില്‍ വിധി പറയുന്നത് വെള്ളിയാഴ്ചയിലേക്ക് മാറ്റിയിരുന്നു.
ഇന്ത്യന്‍ ശിക്ഷ നിയമത്തിലെ 294, 323, 353, 354 വകുപ്പുകള്‍ ചുമത്തിയാണ് അദ്ദേഹത്തെ കസ്‌റ്റഡിയിലെടുത്തതെന്ന് ഔദ്യോഗിക വൃത്തങ്ങള്‍ അറിയിച്ചു. പ്രദേശിക ബിജെപി നേതാവിന്‍റെ പരാതിയുടെ അടിസ്ഥാനത്തില്‍ ഗുജറാത്തിലെ പലന്‍പുരിലെ വസതിയില്‍ നിന്നാണ് ആദ്യത്തെ കേസില്‍ ജിഗ്നേഷ് അറസ്‌റ്റിലായത്.