ജമ്മു കശ്‌മീരിൽ രണ്ട് തീവ്രവാദികളെ പിടികൂടി സുരക്ഷാസേന

തീവ്രവാദികളിൽ നിന്നും ആയുധങ്ങൾ കണ്ടെടുത്തു

ശ്രീനഗർ:ജമ്മു കശ്‌മീരിൽ രണ്ട് തീവ്രവാദികളെ സുരക്ഷാസേന പിടികൂടി. ജമ്മു കശ്‌മീരിലെ കുൽഗാമിൽ നിന്നും യാമിൻ യൂസഫ് ഭട്ട്, ശ്രീനഗർ ജില്ലയിൽ നിന്നും ഷെയ്ഖ് സാഹിദ് ഗുൽസാർ എന്നിവരാണ് അറസ്റ്റിലായത്.

ഇവരുടെ പക്കൽനിന്നും രണ്ട് പിസ്റ്റലുകളും രണ്ട് ഗ്രനേഡുകളും 51 പിസ്റ്റൾ റൗണ്ടുകളും കണ്ടെടുത്തു. അറസ്റ്റ് സംബന്ധിച്ച വിവരങ്ങൾ കശ്‌മീർ സോൺ പൊലീസും ശ്രീനഗർ പൊലീസും ട്വിറ്ററിലൂടെ പങ്കുവെച്ചു.

ബന്ധപ്പെട്ട വകുപ്പുകൾ പ്രകാരം കേസെടുത്തിട്ടുണ്ടെന്നും അന്വേഷണം പുരോഗമിക്കുകയാണെന്നും പൊലീസ് പറഞ്ഞു