ബെംഗളൂരു: ഒരിടവേളയ്ക്ക് ശേഷം വീണ്ടും വിക്ഷേപണത്തിനൊരുങ്ങി ഇസ്രോ. 2022 ലെ ആദ്യ വിക്ഷേപണ ദൗത്യമാണിത്. ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തില്‍ നിന്ന് ഫെബ്രുവരി 14ന് പുലര്‍ച്ചെ 5.59ന് പിഎസ്എല്‍വി സി 52 വിക്ഷേപണം നടക്കുമെന്ന് ഇസ്രോ അറിയിച്ചു.
വിക്ഷേപണത്തിന് 25 മണിക്കൂര്‍ 30 മിനിറ്റ് മുന്‍പ് കൗണ്ട് ഡൗണ്‍ ആരംഭിക്കും. EOS-04 എന്ന് പേരിട്ടിരിക്കുന്ന ഭൗമ നിരീക്ഷണ ഉപഗ്രഹമാണ് പിഎസ്എല്‍വി സി 52 വിക്ഷേപിക്കുക. എത് കാലാവസ്ഥയിലും ഉയർന്ന നിലവാരമുള്ള ചിത്രങ്ങൾ എടുക്കാന്‍ രൂപകൽപ്പന ചെയ്‌തിരിക്കുന്ന ഒരു റഡാർ ഇമേജിങ് ഉപഗ്രഹമാണ് EOS-04.
ഇതിന് പുറമേ 2 ചെറു ഉപഗ്രഹങ്ങളും വിക്ഷേപിക്കും. ഇന്ത്യന്‍ ഇസ്റ്റിസ്റ്റിറ്റ്യൂട്ട് ഓഫ് സയന്‍സ് ആന്‍ഡ് ടെക്‌നോളജിയിലെ വിദ്യാര്‍ഥികള്‍ വികസിപ്പിച്ച INSPIREsat-1, ഇന്ത്യ-ഭൂട്ടാന്‍ സംയുക്തമായി വികസിപ്പിച്ച INS-2B എന്ന രണ്ട് ഉപഗ്രഹങ്ങളാണ് EOS-04 ക്കൊപ്പം ബഹിരാകാശത്തേക്ക് എത്തിക്കുന്നത്.
2022ല്‍ 19 ബഹിരാകാശ ദൗത്യങ്ങള്‍ ലോഞ്ച് ചെയ്യാന്‍ തീരുമാനിച്ചിട്ടുണ്ടെന്ന് ഇസ്രോ ചെയര്‍മാന്‍ എസ്‌ സോമനാഥ് വ്യക്തമാക്കിയിരുന്നു. ഈ വര്‍ഷം ഓഗസ്റ്റില്‍ ചന്ദ്രയാന്‍ മൂന്ന് വിക്ഷേപിക്കാന്‍ ഒരുങ്ങുകയാണ് ഇസ്രോ.
Also read: ട്വീറ്റിനുള്ള മറുപടികള്‍ അസ്വസ്ഥമാക്കുന്നുണ്ടോ? പുതിയ സംവിധാനവുമായി ട്വിറ്റര്‍
