ന്യൂഡൽഹി: ഇതര സംസ്ഥാനങ്ങളിൽ നിന്നുള്ള ലോട്ടറികൾ നിയന്ത്രിക്കാനുള്ള കേരള സർക്കാരിന്‍റെ അധികാരം ചോദ്യം ചെയ്‌ത് നാഗാലാൻഡ് നൽകിയ അപ്പീലിൽ സംസ്ഥാന സർക്കാരിനോട് പ്രതികരണം തേടി സുപ്രീംകോടതി. ലോട്ടറികൾ നിയന്ത്രിക്കാനുള്ള സർക്കാരിന്‍റെ അധികാരം ശരിവച്ച കേരള ഹൈക്കോടതി വിധി ചോദ്യം ചെയ്‌തുകൊണ്ടുള്ള അപ്പീലിലാണ് സുപ്രീംകോടതി പ്രതികരണം തേടിയത്.
2018ൽ കേരള പേപ്പർ ലോട്ടറി (റെഗുലേഷൻ) ചട്ടങ്ങളിൽ കൊണ്ടുവന്ന ഭേദഗതികൾ ഹൈക്കോടതിയുടെ ഡിവിഷൻ ബെഞ്ച് ശരിവക്കുകയും അത് സംസ്ഥാന സർക്കാരിന്‍റെ നിയമനിർമാണ പരിധിയിൽ പെട്ടതാണെന്ന് പറയുകയും ചെയ്‌തിരുന്നു. സംസ്ഥാനത്ത് നാഗാലാൻഡ് സർക്കാരിന്‍റെ ലോട്ടറി ടിക്കറ്റുകളുടെ വിപണനത്തിലും വിൽപനയിലും കേരള സർക്കാർ ഇടപെടുന്നത് തടഞ്ഞ സിംഗിൾ ബെഞ്ച് ഉത്തരവ് റദ്ദാക്കിക്കൊണ്ടായിരുന്നു ഡിവിഷൻ ബെഞ്ച് ഉത്തരവ്.