ബിന്ധ് (മധ്യപ്രദേശ്): സിന്ധു നദിയില്‍ നിന്നും അനധികൃതമായി മണല്‍ കടത്താന്‍ എത്തിച്ച ട്രക്കുകള്‍ പ്രളയ ജലത്തില്‍ മുങ്ങി. കഴിഞ്ഞ ദിവസമാണ് സംഭവം. നദിയിലെ മണല്‍ ഘനനം ജൂണ്‍ 30ന് അവസാനിപ്പിക്കാന്‍ കേന്ദ്ര ഗ്രീന്‍ ട്രൈബ്യൂണല്‍ ഉത്തരവിട്ടിരുന്നു. എന്നാല്‍ ഉത്തരവ് കാറ്റില്‍ പറത്തി മണല്‍ മാഫിയ വലിയ ട്രക്കുകള്‍ എത്തിച്ച് ഘനനം തുടരുകയായിരുന്നു.
ബിന്ധിലെ സിന്ധുനദി തീരത്ത് വന്‍ മണലെടുപ്പ്; പ്രളയ ജലത്തില്‍ അകപ്പെട്ട് ട്രക്കുകള്‍
മധ്യപ്രദേശിലെ ബിന്ധ് ജില്ലയിലെ പറയച്ച് ഗ്രാമത്തിലാണ് സംഭവം. ഘനനത്തിനായി എത്തിച്ച ട്രക്കുകള്‍ അപ്രതീക്ഷിതമായി ഉണ്ടായ വെള്ളപ്പൊക്കത്തില്‍ കുടുങ്ങി. വാഹനങ്ങളിലെ ജീവനക്കാര്‍ ലോറികള്‍ മാറ്റാന്‍ ശ്രമിച്ചെങ്കിലും വെള്ളത്തില്‍ മുങ്ങുകയായിരുന്നു. ഇതോടെ പലരും നീന്തിയാണ് വാഹനത്തില്‍ നിന്നും രക്ഷപ്പെട്ടത്. ഇതിന്‍റെ വീഡിയോകള്‍ സാമൂഹ മാധ്യമങ്ങളില്‍ ഇതിനകം വൈറലായിട്ടുണ്ട്.