ലഖ്‌നൗ: അവധിക്കെത്തിയ വ്യോമസേന ഉദ്യോഗസ്ഥൻ വെടിയേറ്റ് മരിച്ചു. ഉത്തര്‍പ്രദേശിലെ ഉന്നാവോയിലാണ് സംഭവം. ശുക്ലഗഞ്ച് പ്രേം നഗർ നിവാസിയായ പ്രതീക് സിങ് (27) ആണ് മരിച്ചത്. തിങ്കളാഴ്ച രാത്രി വീട്ടിൽ നിന്ന് പോയ ഇയാളെ ശരീരം മുഴുവൻ വെടിയേറ്റ് കൊല്ലപ്പെട്ട നിലയില്‍ കണ്ടെത്തുകയായിരുന്നു.
ജൂണ്‍ 11നാണ് ജമ്മുവില്‍ നിന്ന് പ്രതീക് നാട്ടിലെത്തിയത്. തിങ്കളാഴ്ച രാത്രി ഒമ്പത് മണിയോടെയാണ് പ്രതീക് വീട്ടില്‍ നിന്ന് പോയത്. ഒരു ഫോൺ കോൾ ലഭിച്ച ശേഷമാണ് പ്രതീക് പുറത്തേക്ക് പോയത്. ഏറെ വൈകിയിട്ടും തിരികെ എത്താതെ ഇരുന്നതോടെ വീട്ടുകാർ അന്വേഷിച്ച് ഇറങ്ങിയപ്പോഴാണ് വെടിയേറ്റ മുറിവുകളുമായി മൃതദേഹം റോഡിൽ കിടക്കുന്നത് കണ്ടത്. കണ്ണിനടക്കം വെടിയേറ്റിരുന്നു. ശേഷം മൃതദേഹം പോസ്റ്റ്‌ മോർട്ടത്തിനായി ജില്ലാ ആശുപത്രിയിലേക്ക് മാറ്റി.