ഹൈദരാബാദില്‍ ആറു വയസുകാരിയെ ബലാത്സംഗം ചെയ്‌തുകൊന്ന കേസിലെ പ്രതി മരിച്ച നിലയില്‍

നഗരത്തിൽ എല്ലായിടത്തും പോസ്റ്ററുകൾ ഉള്ളതിനാൽ രക്ഷപ്പെടാനാകില്ലെന്ന് കരുതി ഇയാള്‍ ആത്മഹത്യ ചെയ്തതെന്നാണ് പൊലീസ് ഭാഷ്യം

ഹൈദരാബാദ്:സൈദാബാദില്‍ ആറ് വയസുകാരിയെ ബലാത്സംഗം ചെയ്‌തു കൊലപ്പെടുത്തിയ കേസിലെ പ്രതിയെ മരിച്ച നിലയില്‍ കണ്ടെത്തി. കേസില്‍ പ്രതിയായ പല്ലക്കോണ്ട രാജുവെന്നയാളെ വാറങ്കൽ ജില്ലയിലെ ഘാൻപൂരിലെ റെയിൽവേ ട്രാക്കിലാണ് മരിച്ച നിലയില്‍ കണ്ടെത്തിയത്.

നഗരത്തിൽ എല്ലായിടത്തും പോസ്റ്ററുകൾ ഉള്ളതിനാൽ രക്ഷപ്പെടാനാകില്ലെന്ന് കരുതി ഇയാള്‍ ആത്മഹത്യ ചെയ്തെന്നാണ് പൊലീസ് ഭാഷ്യം. സെപ്റ്റംബര്‍ ഒമ്പതിനാണ് ഇയാള്‍ അയല്‍വാസിയായ ആറ് വയസുകാരിയെ ബലാത്സംഗം ചെയ്‌തത്.

ഒരാഴ്ചയോളമായി തിരയുന്ന ഇയാള്‍ക്കായി തെലങ്കാന പൊലീസ് 10 ലക്ഷം രൂപ ഇനാം പ്രഖ്യാപിച്ചിരുന്നു. അതേസമയം പ്രതിയെ എന്‍കൗണ്ടറില്‍ കൊലപ്പെടുത്തണമെന്ന മന്ത്രി മല്ലറെഡ്ഡിയുടെ പ്രസ്താവന വിവാദമായിരുന്നു.

എന്നാല്‍ നിയമത്തിൽ മാറ്റങ്ങൾ നിർദേശിക്കാനും, അത്തരക്കാർക്ക് കടുത്ത ശിക്ഷ ലഭിക്കുന്നുണ്ടെന്ന് ഉറപ്പുവരുത്താനുമായിരുന്നു താൻ ഉദ്ദേശിച്ചതെന്ന് മന്ത്രി പിന്നീട് വിശദീകരിച്ചു.