മുംബൈയില്‍ കനത്ത മഴ; പല ഭാഗങ്ങളും വെള്ളത്തിനടില്‍

വെള്ളക്കെട്ട് മൂലം പല ഭാഗങ്ങളിലും ഗതാഗത തടസം അനുഭവപ്പെട്ടു

മുംബൈ: കനത്ത മഴയെ തുടര്‍ന്ന് മുംബൈയിലെ പല ഭാഗങ്ങളും വെള്ളത്തിനടിയിലായി. വെള്ളക്കെട്ട് മൂലം പല ഭാഗങ്ങളിലും ഗതാഗത തടസം അനുഭവപ്പെട്ടു. പലയിടത്തും റെയില്‍വേ ട്രാക്കുകള്‍ വെള്ളത്തിനടിയിലായതോടെ ട്രെയിനുകള്‍ 20-25 മിനിറ്റ് വൈകിയാണ് ഓടുന്നത്.

കുർള-വിദ്യാവിഹാർ സ്ലോ പാത അതിവേഗ പാതയിലേക്ക് തിരിച്ചുവിട്ടിട്ടുണ്ടെന്നും ട്രാൻസ്-ഹാർബർ പാതയില്‍ ഗതാഗതം സുഗമമായി നടക്കുന്നുണ്ടെന്നും സെൻട്രൽ റെയിൽവേ ചീഫ് പബ്ലിക് റിലേഷൻസ് ഓഫിസർ അറിയിച്ചു.

അതേസമയം, നഗര പ്രദേശങ്ങളില്‍ നേരിയ തോതിലും ഒറ്റപ്പെട്ട പ്രദേശങ്ങളില്‍ അതി ശക്തമായും മഴ പെയ്യാൻ സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രത്തിന്‍റെ മുന്നറിയിപ്പ്. മുംബൈയ്ക്ക് പുറമേ താനെ, നവി മുംബൈ, പല്‍ഘാര്‍ എന്നിവിടങ്ങളിലും കനത്ത മഴ ലഭിയ്ക്കുന്നുണ്ട്.