ന്യൂഡൽഹി : രാജ്യം നേരിടുന്ന കൽക്കരി ക്ഷാമം പരിഹരിക്കാന്‍ പ്രതിദിന ഖനനം വർധിപ്പിക്കുമെന്ന് കേന്ദ്രസർക്കാർ. 1.94ൽ നിന്ന് രണ്ട് മില്യൺ ടൺ ആയി പ്രതിദിന ഖനനം ഉയർത്തുമെന്ന് കേന്ദ്ര കല്‍ക്കരി മന്ത്രാലയം വ്യക്തമാക്കി. അഞ്ച് ദിവസത്തേക്കുള്ള സ്റ്റോക്ക് നിലവിലുണ്ടെന്നും സംസ്ഥാനങ്ങൾക്കും താപനിലയങ്ങൾക്കും നൽകുന്ന കൽക്കരിയുടെ അളവിൽ കുറവ് വരുത്തിയിട്ടില്ലെന്നും സർക്കാർ വൃത്തങ്ങളെ ഉദ്ധരിച്ച് വാർത്താഏജൻസി റിപ്പോർട്ട് ചെയ്‌തു.
ഒരു മാസത്തിനുള്ളിൽ സ്ഥിതിഗതികൾ സാധാരണ നിലയിലെത്തും. നിലവിലെ അവസ്ഥയ്ക്ക് കാരണമായി നിരവധി സാഹചര്യങ്ങളുണ്ട്. ജനുവരി മുതൽ കേന്ദ്രം സംസ്ഥാന സർക്കാരുകൾക്ക് മുൻകരുതൽ നിർദേശങ്ങൾ നൽകിയിരുന്നു.
എന്നാല്‍ സംസ്ഥാനങ്ങൾ ഈ നിർദേശങ്ങള്‍ ഗൗനിച്ചില്ലെന്നും കേന്ദ്രസര്‍ക്കാര്‍ വൃത്തങ്ങളെ ഉദ്ധരിച്ച് വാർത്താഏജൻസി റിപ്പോർട്ട് ചെയ്യുന്നു. കൽക്കരി ഖനനം ചെയ്‌ത് പരിധിയേക്കാള്‍ കൂടുതൽ സൂക്ഷിക്കുന്ന സാഹചര്യം അപകടം വിളിച്ചുവരുത്തും.