ന്യൂഡൽഹി : ഇന്ത്യയിലെ ആൻഡ്രോയിഡ് ഉപയോക്താക്കൾക്ക് (Android Users) ഭൂകമ്പ മുന്നറിയിപ്പ് നൽകുന്ന സേവനം നൽകാൻ ഗൂഗിൾ (Google). ഭൂകമ്പത്തിന്‍റെ തീവ്രത മനസിലാക്കുന്നതിനുള്ള സേവനം സ്‌മാർട്ട്‌ഫോണുകളിലെ സെൻസറുകൾ ഉപയോഗിച്ച് ലഭ്യമാക്കുമെന്ന് ഗൂഗിൾ ഇന്ന് അറിയിച്ചു. ദേശീയ ദുരന്ത നിവാരണ അതോറിറ്റി (National Disaster Management Authority), നാഷണൽ സീസ്‌മോളജി സെന്‍റർ (National Seismology Centre) എന്നിവരുമായി സഹകരിച്ചാണ് ഗൂഗിൾ ആൻഡ്രോയിഡ് ഭൂകമ്പ മുന്നറിയിപ്പ് സംവിധാനം (Android Earthquake Alerts System) അവതരിപ്പിക്കുന്നത്.
ആൻഡ്രോയിഡ് 5 ലും അതിന് ശേഷമുള്ള അപ്‌ഡേറ്റഡ് ഓപ്പറേറ്റിങ് സിസ്‌റ്റങ്ങളിലുമാണ് (Android 5 and later versions) സേവനം ലഭ്യമാകുക. അടുത്ത ആഴ്‌ചയോടെ ആൻഡ്രോയിഡ് ഭൂകമ്പ മുന്നറിയിപ്പ് സംവിധാനം പ്രവർത്തനക്ഷമമാകുമെന്നാണ് ഗൂഗിൾ അധികൃതർ നൽകുന്ന വിവരം. സ്‌മാർട്ട്‌ഫോണുകളിലെ ചെറിയ ആക്‌സിലറോമീറ്ററുകളെ (accelerometers) മിനി സീസ്‌മോമീറ്ററുകളായി (seismometers) പ്രവർത്തിപ്പിച്ചാണ് ഈ സംവിധാനം പ്രവർത്തിക്കുക.
Also Read :How To Unsend An Email In Gmail: ജിമെയിലിൽ മെയിൽ അയച്ചത് ഒഴിവാക്കുന്നതെങ്ങനെ
ഭൂകമ്പത്തിന്‍റെ ആരംഭത്തിൽ തന്നെ സെൻസറുകൾ മുഖേന അത് തിരിച്ചറിയാൻ കഴിയും. ഒരേ സമയം ഭൂകമ്പം പോലുള്ള ചലനങ്ങൾ പല ഫോണുകളിലായി കണ്ടെത്തുകയാണെങ്കിൽ ഈ വിവരങ്ങൾ ഉപയോഗിച്ച് ഗൂഗിൾ സെർവറിന് അതിന്‍റെ പ്രഭവകേന്ദ്രവും വ്യാപ്‌തിയും കണ്ടെത്താൻ സാധിക്കും. തുടർന്ന് ഇന്‍റർനെറ്റ് സിഗ്‌നലുകൾ പ്രകാശവേഗതയിൽ സഞ്ചരിച്ച് ശക്തമായ ഭൂകമ്പം അനുഭവപ്പെടുന്നതിന് മുൻപ് തന്നെ മുന്നറിയിപ്പുകൾ സ്‌മാർട്ട്‌ഫോൺ ഉപയോക്താക്കൾക്ക് ലഭിക്കും.