'ഇന്ത്യയിലെ ഏറ്റവും മോശം ഭാഷ'; ഗൂഗിൾ ഇന്ത്യക്കെതിരെ പ്രതിഷേധവുമായി സൈബർ ലോകം

'ഇന്ത്യയിലെ ഏറ്റവും മോശം ഭാഷ' ക്കുള്ള ഗൂഗിൾ സെർച്ച് ഫലത്തിൽ “കന്നഡ” കാണിച്ചതിന് വിവാദം നേരിട്ട് ഗൂഗിൾ ഇന്ത്യ. ഇത് നെറ്റിസണുകളിലും രാഷ്ട്രീയ നേതാക്കളിലും പ്രകോപനം സൃഷ്ടിച്ചിരിക്കുകയാണ്.

ബെംഗളുരു: 'ഇന്ത്യയിലെ ഏറ്റവും മോശം ഭാഷ' എന്ന കീവേർഡുകളുള്ള ഗുഗിൾ സെർച്ച് ഫലത്തിൽ "കന്നഡ" കാണിച്ചതിന് പുതിയ വിവാദം നേരിട്ട് ഗൂഗിൾ ഇന്ത്യ. കഴിഞ്ഞ ദിവസം ഉപഭോക്താക്കൾക്കിടയിൽ ഇത് വന്‍ പ്രതിഷേധത്തിനാണ് തിരികൊളുത്തിയത്. കർണാടക സർക്കാർ കമ്പനിക്കെതിരെ നിയമ നടപടികൾ കൈക്കാള്ളുമെന്ന് മുന്നറിയിപ്പ് നൽകി. അതേസമയം കമ്പനിയുടെ പ്രതിഫലനമല്ല സെർച്ച് ഫലങ്ങളെന്നും ജനങ്ങളുടെ വികാരത്തെ വ്രണപ്പെടുത്തിയതിന് ക്ഷമ ചോദിക്കുന്നതായും ഗൂഗിൾ ഇന്ത്യ വക്താവ് പറഞ്ഞു.

ഗൂഗിൾ പരസ്യമായി മാപ്പ് പറയണമെന്ന് കർണാടകയുടെ സംസ്കാരിക വനം വകുപ്പ് മന്ത്രി അരവിന്ദ് ലിംബാവലി ട്വിറ്ററിൽ കുറിച്ചു. "2,500 വർഷങ്ങളുടെ പഴക്കമുള്ള കന്നഡ ഭാഷയ്ക്ക് അതിന്‍റേതായ ഒരു ചരിത്രമുണ്ട്. ഈ രണ്ടര സഹസ്രാബ്ദങ്ങളിലൂടെ കന്നഡിഗരുടെ അഭിമാനമാണ്. കന്നഡയെ ഇപ്പോൾ 'ഇന്ത്യയിലെ ഏറ്റവും മോശം' ഭാഷ എന്ന് വിളിക്കുന്നുവെങ്കിൽ കന്നഡിഗരെ അപമാനിക്കാനുള്ള ഗൂഗിളിന്‍റെ ശ്രമം മാത്രമാണിത്" എന്ന് അദ്ദേഹം ട്വീറ്റിൽ പറഞ്ഞു.

ബെംഗളൂരു എംപി സി. എ. മോഹന്‍ കർണാടകയെ ‘ഇന്ത്യയിലെ ഏറ്റവും വൃത്തികെട്ട ഭാഷ’ എന്ന് കാണിക്കുന്ന ഗൂഗിൾ സെർച്ച് എഞ്ചിന്‍റെ സ്ക്രീൻഷോട്ട് സമൂഹമാധ്യമത്തിൽ പങ്കുവെച്ചു. മഹാനായ വിജയനഗര സാമ്രാജ്യത്തിന്‍റെ നാടാണ് കർണാടകയെന്നും കന്നഡ ഭാഷയ്ക്ക് സമ്പന്നമായ പൈതൃകവും മഹത്തായ പാരമ്പര്യവും അതുല്യ സംസ്കാരവുമുണ്ടെന്നും മോഹൻ പറഞ്ഞു. ലോകത്തിലെ ഏറ്റവും പുരാതന ഭാഷകളിലൊന്നായ കന്നഡയിൽ ജൊഫ്രി ചൗസർ ജനിക്കുന്നതിനുമുമ്പ് ഇതിഹാസങ്ങൾ എഴുതിയ മികച്ച പണ്ഡിതന്മാരുണ്ടായിരുന്നു. ”അദ്ദേഹം ട്വീറ്ററിൽ കുറിച്ചു. ജനതാദൾ (എസ്) നേതാവ് എച്ച്.ഡി. കുമാരസ്വാമിയും ഗൂഗിളിനെതിരെ രംഗത്തെത്തി. ഭാഷയെക്കുറിച്ച് പറയുമ്പോൾ ഗൂഗിൾ 'നിരുത്തരവാദപരമായി പെരുമാറുന്നത്' എന്തുകൊണ്ടാണെന്ന് അദ്ദേഹം ചോദിച്ചു.