ഹൈദരാബാദ്: ബാങ്കിലേക്ക് നേരിട്ടെത്താതെ പണം പിന്‍വലിക്കാനും നിക്ഷേപിക്കാനും സാധിക്കുന്ന എടിഎമ്മുകളുടെയും സിഡിഎമ്മുകളുടെയും കാലമാണിത്. ആദ്യം വിദേശത്തായിരുന്നുവെങ്കില്‍ നിലവില്‍ ഇന്ത്യയില്‍ വെള്ളത്തിനായുള്ള വാട്ടര്‍ എടിഎമ്മുകളും പ്രചാരത്തിലുണ്ട്. അങ്ങനെയിരിക്കെ സ്വര്‍ണം പിന്‍വലിക്കാനുള്ള ഗോള്‍ഡ് എടിഎമ്മിനായി സോഫ്‌റ്റ്‌വെയര്‍ തയ്യാറാക്കി ജനങ്ങളെ അമ്പരപ്പിക്കുകയാണ് ഓപണ്‍ ക്യൂബ്‌സ് എന്ന സ്‌റ്റാര്‍ട്ടപ്പിന്‍റെ സ്ഥാപകനായ ആന്ധ്രപ്രദേശിലെ അനകപള്ളി സ്വദേശി പി.വിനോദ്.
'ഗോള്‍ഡ് എടിഎം' വന്ന വഴി: 'ഗോള്‍ഡ് സിക്ക' എന്ന കമ്പനിയാണ് ഗോള്‍ഡ് എടിഎം എന്ന ആവശ്യവുമായി വിനോദിനെ ബന്ധപ്പെടുന്നത്. ഗോള്‍ഡ് എടിഎം നിലവില്‍ ദുബൈ, ലണ്ടന്‍ എന്നിവിടങ്ങളില്‍ ഇത്തരം എടിഎമ്മുകളും നിര്‍മാണ യൂണിറ്റുകളും ഉണ്ടെങ്കിലും ഇവിടങ്ങളിലെല്ലാം നിര്‍മാണത്തുക ഏറെ കൂടുതലാണ് എന്നതാണ് കമ്പനിയെ വിനോദിലേക്ക് അടുപ്പിച്ചത്. മറ്റുള്ളവരെ അപേക്ഷിച്ച് 30 ശതമാനം കുറഞ്ഞ നിരക്കില്‍ വിനോദ് ഇതിന്‍റെ പ്രവര്‍ത്തനത്തിനുള്ള സോഫ്‌റ്റ്‌വെയര്‍ തയ്യാറാക്കി നല്‍കാമെന്നേറ്റു. തന്നെ വിശ്വസിച്ചേല്‍പ്പിച്ച ദൗത്യത്തില്‍ വിനോദും സഹപ്രവര്‍ത്തകരും മുഴുകിയതോടെ ഏതാണ്ട് മൂന്നുമാസത്തില്‍ ഗോള്‍ഡ് എടിഎം സഫലമായി.
എന്താണ് ഗോള്‍ഡ് എടിഎമ്മിന്‍റെ സവിശേഷതകള്‍: വിദേശരാജ്യങ്ങളില്‍ നിലവിലുള്ള ഗോള്‍ഡ് എടിഎമ്മുകളില്‍ 20 ഗ്രാമില്‍ കുറവ് സ്വര്‍ണം പിന്‍വലിക്കാനാവില്ല. എന്നാല്‍ നിലവില്‍ വിനോദിന്‍റെ നേതൃത്വത്തിലൊരുങ്ങിയ എടിഎമ്മില്‍ 0.5 ഗ്രാം മുതല്‍ 100 ഗ്രാം വരെ സ്വര്‍ണം പിന്‍വലിക്കാനാകും. മാത്രമല്ല ലണ്ടന്‍ ബുള്ളിയന്‍ മാര്‍ക്കറ്റിനെ അടിസ്ഥാനപ്പെടുത്തി ഓരോ നാല് സെക്കന്‍റിലും എടിഎമ്മില്‍ സ്വര്‍ണത്തിന്‍റെ വിലയ്‌ക്ക് മാറ്റം വന്നുകൊണ്ടിരിക്കും. ഇത്രയും വിലമതിക്കുന്ന എടിഎമ്മിന്‍റെ സുരക്ഷയിലും വിനോദും സംഘവും വിട്ടുവീഴ്‌ച നല്‍കിയിട്ടില്ല. ജാമറുകള്‍ ഉപയോഗിച്ചാണ് ഇതിലേക്കുള്ള കടന്നുകയറ്റത്തെ ഇവര്‍ പ്രധാനമായും സംരക്ഷിച്ചിരിക്കുന്നത്. ഇത്തരത്തില്‍ തയ്യാറാക്കി ഹൈദരാബാദിലെ ബെഗുംപേട്ടില്‍ സ്ഥാപിച്ചതോടെ രാജ്യത്ത് പ്രവര്‍ത്തിക്കുന്ന ആദ്യ ഗോള്‍ഡ് എടിഎമ്മായും ഇത് മാറി.
ഒരു എഞ്ചിനീയറുടെ ജനനം: വിനോദിന്‍റെ പിതാവ് ബിസിനസിനായി കുറച്ചുകാലം ബെംഗളൂരുവിലുണ്ടായിരുന്നു. ഈ സമയത്തെ വേനല്‍ക്കാല അവധിക്ക് കൗതുകങ്ങള്‍ ഏറെ ഇഷ്‌ടമുള്ള വിനോദ് വെബ് ഡെവലപ്‌മെന്‍റ് കോഴ്‌സിന് ചേര്‍ന്നു. അതുകൊണ്ടുതന്നെ സ്‌കൂളില്‍ പത്താം ക്ലാസ് പൂര്‍ത്തിയാകുമ്പോഴേക്കും വിനോദ് വെബ് ഡെവലപ്‌മെന്‍റില്‍ വൈദഗ്‌ധ്യവും തെളിയിച്ചു. വെബ്സൈറ്റുകള്‍ നിര്‍മിച്ച് നല്‍കി ആ കൗമാരക്കാരന്‍ പോക്കറ്റ് മണി സമ്പാദ്യവും തുടങ്ങി. ഈ വൈദഗ്‌ധ്യം എന്തുകൊണ്ട് തൊഴില്‍പരമായി ഉപയോഗിച്ചുകൂടാ എന്ന് ചിന്തിച്ചുതുടങ്ങിയതോടെ വിനോദ് എഞ്ചിനീയറിങ്ങിലും എത്തിപ്പെട്ടു.