സെഹോർ : മധ്യപ്രദേശിലെ സെഹോർ ജില്ലയിൽ ചൊവ്വാഴ്‌ച (ജൂൺ 6) കുഴൽക്കിണറിൽ വീണ രണ്ടര വയസുകാരി മരിച്ചു. 55 മണിക്കൂർ നീണ്ട പരിശ്രമത്തിനൊടുവിൽ കുട്ടിയെ പുറത്തെടുത്ത് ആശുപത്രിയിൽ എത്തിച്ചെങ്കിലും മരണം സ്ഥിരീകരിക്കുകയായിരുന്നു. 135 അടി താഴ്‌ചയിൽ വീണ സൃഷ്‌ടി കുശ്വാഹ എന്ന രണ്ടരവയസുകാരിയാണ് മരിച്ചത്.
കുഴൽക്കിണറിൽ നിന്ന് റോബോട്ടിക് ആയുധങ്ങൾ ഉപയോഗിച്ചാണ് പെൺകുട്ടിയെ പുറത്തെടുത്തത്. ചൊവ്വാഴ്‌ചയാണ് പെൺകുട്ടി 300 അടി താഴ്‌ചയുള്ള കുഴൽക്കിണറിൽ അകപ്പെട്ടത്. 40 അടി താഴ്‌ചയിൽ കുടുങ്ങി കിടക്കുകയായിരുന്നു കുട്ടി. രക്ഷാപ്രവർത്തനത്തിനിടെ ഹുക്ക് ഉപയോഗിച്ച് കുട്ടിയെ പുറത്തെടുക്കാൻ ശ്രമിച്ചെങ്കിലും പരാജയപ്പെട്ടു.
എൻഡിആർഎഫ്, എസ്‌ഡിഇആർഎഫ്, സൈനിക ഉദ്യോഗസ്ഥർ എന്നിവർ രക്ഷാപ്രവർത്തനത്തിൽ ഏർപ്പെട്ടിരുന്നു. മുഴുവൻ അഡ്‌മിനിസ്‌ട്രേറ്റീവ് ജീവനക്കാരും മെഡിക്കൽ സംഘവും സ്ഥലത്തുണ്ടായിരുന്നു.
40 അടി താഴ്‌ചയിൽ കുടുങ്ങി, വീണ്ടും 100 അടിയോളം താഴ്‌ചയിലേക്ക് : ജില്ല ആസ്ഥാനത്തെ മാണ്ഡി പൊലീസ് സ്റ്റേഷൻ പരിധിയിലെ മുംഗാവലി ഗ്രാമത്തിൽ ചൊവ്വാഴ്‌ച കളിക്കുന്നതിനിടെ രണ്ടര വയസുകാരി സൃഷ്‌ടി കുശ്വാഹ കുഴൽക്കിണറിൽ വീഴുകയായിരുന്നു. വിവരമറിഞ്ഞ് പൊലീസ്-അഡ്‌മിനിസ്‌ട്രേഷനും റെസ്‌ക്യൂ ടീമും സ്ഥലത്തെത്തി രക്ഷാപ്രവർത്തനം ആരംഭിച്ചു.
പെൺകുട്ടി ആദ്യം കുഴൽക്കിണറിൽ 40 അടി താഴ്‌ചയിൽ കുടുങ്ങി. ശ്വാസതടസം ഉണ്ടാകാതിരിക്കാൻ പൈപ്പിലൂടെ കുട്ടിക്ക് ഓക്‌സിജൻ എത്തിച്ച് നൽകി. ജെസിബി ഉപയോഗിച്ച് കുഴൽക്കിണറിന്‍റെ അരികുകൾ കുഴിച്ചു. അവിടെ നിന്ന് തുരങ്കം ഉണ്ടാക്കി പെൺകുട്ടിയുടെ അടുത്തെത്താനായിരുന്നു ശ്രമം. കുഴിയെടുക്കുന്നതിനിടെ രക്ഷാപ്രവർത്തനത്തിന് ഉപയോഗിച്ച ഉപകരണങ്ങളുടെ പ്രകമ്പനം മൂലം കുട്ടി വീണ്ടും 100 അടിയോളം താഴ്‌ചയിലേക്ക് വീണു.