ന്യൂഡൽഹി : യുക്രൈൻ യുദ്ധം (Ukraine War) അവസാനിപ്പിക്കണമെന്ന് ജി20 ഉച്ചകോടിയിൽ (G20 Summit) സംയുക്ത പ്രസ്‌താവന. ആണവായുധങ്ങളുടെ ഉപയോഗമോ, ഉപയോഗിക്കുമെന്ന ഭീഷണിയോ അംഗീകരിക്കാനാകില്ലെന്നും സംയുക്ത പ്രസ്‌താവനയിൽ ഊന്നിപ്പറഞ്ഞു. ജി20 നേതാക്കൾ അംഗീകരിച്ച 37 പേജുള്ള സമവായ പ്രഖ്യാപനം യുക്രൈനിൽ സമഗ്രവും, നീതിപൂർവകവും, സുസ്ഥിരവുമായ സമാധാനം ഉറപ്പാക്കാൻ അംഗരാജ്യങ്ങളോട് ആവശ്യപ്പെടുകയും ചെയ്‌തു.
'പ്രാദേശിക സമഗ്രത, പരമാധികാരം, അന്താരാഷ്‌ട്ര മാനുഷിക നിയമം, സമാധാനവും സുസ്ഥിരതയും സംരക്ഷിക്കുന്ന ബഹുരാഷ്‌ട്ര വ്യവസ്ഥ എന്നിവയുൾപ്പെടെയുള്ള അന്താരാഷ്‌ട്ര നിയമത്തിന്‍റെ തത്വങ്ങൾ ഉയർത്തിപ്പിടിക്കാൻ ഞങ്ങൾ എല്ലാ രാജ്യങ്ങളോടും ആവശ്യപ്പെടുന്നു. സംഘർഷങ്ങളുടെ സമാധാനപരമായ പരിഹാരത്തിനും പ്രതിസന്ധികളെ അഭിമുഖീകരിക്കാനുള്ള ശ്രമങ്ങൾക്കും, നയതന്ത്രവും ചർച്ചകളും നിർണായകമാണ്.
ആഗോള സമ്പദ്‌വ്യവസ്ഥയിൽ യുദ്ധം ചെലുത്തുന്ന പ്രതികൂല ആഘാതം പരിഹരിക്കാനുള്ള ശ്രമത്തിൽ ഞങ്ങൾ ഒന്നിക്കും, കൂടാതെ സമഗ്രമായ, പിന്തുണയ്ക്കുന്ന പ്രസക്തവും ക്രിയാത്മകവുമായ എല്ലാ സംരംഭങ്ങളെയും സ്വാഗതം ചെയ്യും. അത് 'ഒരു ഭൂമി, ഒരു കുടുംബം, ഒരു ഭാവി' എന്ന ആശയത്തിൽ രാഷ്‌ട്രങ്ങൾക്കിടയിൽ സമാധാനപരവും സൗഹാർദ്ദപരവും നല്ലതുമായ ബന്ധങ്ങൾ പ്രോത്സാഹിപ്പിക്കുന്നതിനുള്ള യുഎൻ ചാർട്ടറിന്‍റെ എല്ലാ ലക്ഷ്യങ്ങളും തത്വങ്ങളും ഉയർത്തിപ്പിടിക്കും, പ്രസ്‌താവനയിൽ വ്യക്‌തമാക്കി.
അതേസമയം റഷ്യയെ സംയുക്‌തമായി അപലപിക്കാതെയാണ് സംയുക്ത പ്രസ്‌താവന പുറപ്പെടുവിച്ചിരിക്കുന്നത്. യുക്രൈനിലെ യുദ്ധത്തെക്കുറിച്ച്, ബാലിയിൽ നടന്ന ചർച്ചയെ (Bali Declaration) ഓർമ്മിപ്പിക്കുമ്പോൾ, യുഎൻ സുരക്ഷ സമിതിയിലും യുഎൻ ജനറൽ അസംബ്ലിയിലും (എ/ആർഇഎസ്/ഇഎസ്-11/1, എ/ആർഇഎസ്/ഇഎസ്-11, എ/ആർഇഎസ്/ഇഎസ്-11/6) അംഗീകരിച്ച ദേശീയ നിലപാടുകളും പ്രമേയങ്ങളും ഞങ്ങൾ ആവർത്തിച്ചു.