ആഗ്രയിൽ വാഹനാപകടം; നാല് പേർ മരിച്ചു

കാറിന്‍റെ ടയർ പൊട്ടിയതാണ് അപകടകാരണമെന്ന് പൊലീസ് പറഞ്ഞു

ലഖ്നൗ: ആഗ്രയിൽ കാർ ഡിവൈഡറിൽ ഇടിച്ച് മറിഞ്ഞ് നാല് പേർ മരിച്ചു. രണ്ട് പേർക്ക് പരിക്കേറ്റു.ആഷിഷ് (19), അർഷാദ് (19), നിഖിൽ (18) എന്നിവരാണ് മരിച്ചത്. അപകടത്തിൽ 16 വയസുള്ള ആൺകുട്ടിയും മരിച്ചു. നാലുപേരും ആഗ്ര സ്വദേശികളാണ്.ആറ് പേരാണ് കാറിൽ ഉണ്ടായിരുന്നത്.

ചൊവ്വാഴ്ച രാത്രിയിലാണ് സംഭവം. യനുമ ബ്രിഡ്ജിൽ റഹൻകൽ ടോൾ പ്ലാസക്ക് സമീപമാണ് അപകടമുണ്ടായത്. ഏറ്റ്മാഡ്പൂർ പൊലീസ് സ്റ്റേഷൻ പരിധിയിൽ വരുന്ന ഭാഗത്ത് ചൊവ്വാഴ്ച രാത്രി 10.30ഓടെയാണ് അപകടമുണ്ടായതെന്ന് പൊലീസ് പറഞ്ഞു. പിറന്നാൾ ആഘോഷം കഴിഞ്ഞ് മടങ്ങിയ സംഘമാണ് അപകടത്തിൽ പെട്ടത്.

ടയർ പൊട്ടിയതിനെ തുടർന്ന് കാറിന്‍റെ ബാലൻസ് നഷ്ടപെടുകയായിരുന്നു. ഇതേ തുടർന്ന് സമീപത്തെ ഡിവൈഡറിൽ ഇടിച്ച് മറിയുകയായിരുന്നു. കാർ പൂർണമായും തകർന്നു.

പരിക്കേറ്റവർ സ്വകാര്യ ആശുപത്രിയിൽ ചികിത്സയിലാണ്. മൃതദേഹങ്ങൾ പോസ്റ്റ്‌മോർട്ടത്തിന് അയച്ചതായി പൊലീസ് പറഞ്ഞു.