പ്രായപൂർത്തിയാകാത്ത പെൺകുട്ടികളെ ലൈംഗികമായി പീഡിപ്പിച്ച കേസില്‍ നാല് പേർ അറസ്റ്റിൽ

ഷെൽറ്റർ ഹോമിലെ അന്തേവാസികളായ പെൺകുട്ടികൾ നൽകിയ പരാതിയുടെ അടിസ്ഥാനത്തിലാണ് ഷെൽറ്റർ ഹോം മാനേജർ അടക്കമുള്ളവരെ അറസ്റ്റ് ചെയ്തത്

റാഞ്ചി: ഷെൽറ്റർ ഹോമിലെ അന്തേവാസികളായ പ്രായപൂർത്തിയാകാത്ത പെൺകുട്ടികളെ ശാരീരിക ചൂഷണത്തിനും ലൈംഗിക പീഡനത്തിനും ഇരയാക്കിയ കേസിൽ ഷെൽറ്റർ ഹോം മാനേജർ, ഭാര്യ, വാർഡൻ എന്നിവരടക്കം നാല് പേരെ പൊലീസ് അറസ്റ്റ് ചെയ്തു. ജാർഖണ്ഡിലെ ജംഷദ്‌പൂരിലാണ് സംഭവം.

ശാരീരിക ചൂഷണം, ലൈംഗിക പീഡനം, നിർബന്ധിത ജോലി എന്നിവയ്ക്ക് വിധേയമാകുന്നു എന്ന് കാണിച്ച് പെൺകുട്ടികൾ നൽകിയ പരാതിയുടെ അടിസ്ഥാനത്തിൽ മദർ തെരേസ വെൽഫെയർ ട്രസ്റ്റ് മാനേജർ ഹർപാൽ സിങ്, ഭാര്യ പുഷ്പ തിർകി, വാർഡൻ ഗീതാ ദേവി, സംഭവത്തിൽ ഉൾപ്പെട്ട മറ്റൊരാൾ എന്നിവരെ അറസ്റ്റ് ചെയ്തതായി ജംഷഡ്‌പൂർ സിറ്റി പൊലീസ് സൂപ്രണ്ട് സുഭാഷ് ചന്ദ്ര ജാട്ട് പറഞ്ഞു.

പരാതിയുടെ അടിസ്ഥാനത്തിൽ എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിച്ചതായി പൊലീസ് പറഞ്ഞു. മറ്റൊരു അഭയകേന്ദ്രത്തിലേക്ക് മാറ്റുന്നതിനിടെ കാണാതായ രണ്ട് പ്രായപൂർത്തിയാകാത്ത പെൺകുട്ടികളെ കണ്ടെത്താൻ എല്ലാ ശ്രമങ്ങളും നടക്കുന്നുണ്ടെന്നും പൊലീസ് അറിയിച്ചു.