മുതിർന്ന കോൺഗ്രസ് നേതാവ് ജഗന്നാഥ പഹാഡിയ കൊവിഡ് ബാധിച്ച് മരിച്ചു

രാജസ്ഥാൻ മുഖ്യമന്ത്രി അശോക് ഗെലോട്ട് അനുശോചിച്ചു.

ജയ്‌പൂർ: മുതിർന്ന കോൺഗ്രസ് നേതാവും രാജസ്ഥാൻ മുൻ മുഖ്യമന്ത്രിയുമായ ജഗന്നാഥ പഹാഡിയ കൊവിഡ് ബാധിച്ച് മരിച്ചു. 89 വയസായിരുന്നു. 1980-81 വർഷങ്ങളിൽ രാജസ്ഥാൻ മുഖ്യമന്ത്രിയുമായും, ഹരിയാന, ബിഹാർ സംസ്ഥാനങ്ങളിൽ ഗവർണറായും പ്രവർത്തിച്ചിട്ടുണ്ട്.

രാജസ്ഥാൻ മുഖ്യമന്ത്രി അശോക് ഗെലോട്ട് ജഗന്നാഥ പഹാഡിയയുടെ മരണത്തിൽ ഞെട്ടൽ രേഖപ്പെടുത്തി. ആദ്യകാലം തൊട്ടേ വളരെ അടുപ്പമുണ്ടായിരുന്ന നേതാവായിരുന്നു പഹാഡിയയെന്നും അദ്ദേഹത്തിന്‍റെ നിര്യാണം വ്യക്തിപരമായ നഷ്‌ടമാണെന്നും അശോക് ഗെലോട്ട് ട്വീറ്റ് ചെയ്‌തു.

ജഗന്നാഥ പഹാഡിയയുടെനിര്യാണത്തിൽ അനുശോചിച്ച് ഇന്ന് സർക്കാർ ഓഫീസുകൾ അടച്ചിടുമെന്നും ദേശീയ പതാക താഴ്‌ത്തിക്കെട്ടുമെന്നും സംസ്ഥാന സർക്കാർ അറിയിച്ചു. പഹാഡിയയ്ക്ക് അനുശോചനം അറിയിക്കുന്നതിനായി ഇന്ന് ഉച്ചയ്ക്ക് 12ന് മന്ത്രിസഭാ യോഗം ചേരും.