തെന്നിന്ത്യന്‍ സൂപ്പര്‍താരം രാഘവ ലോറൻസും (Raghava Lawrence) ബോളിവുഡ് താരം കങ്കണ റണാവത്തും (Kangana Ranaut) കേന്ദ്രകഥാപാത്രങ്ങളില്‍ എത്തുന്ന ചിത്രമാണ് 'ചന്ദ്രമുഖി 2' (Chandramukhi 2). സിനിമയുടെ ഫസ്റ്റ്ലുക്ക് പോസ്‌റ്റര്‍ (Chandramukhi 2 First look poster) റിലീസ് ചെയ്‌തു. ചിത്രത്തില്‍ നിന്നുള്ള രാഘവ ലോറന്‍സിന്‍റെ പോസ്‌റ്ററാണ് നിര്‍മാതാക്കള്‍ പുറത്തുവിട്ടത്.
വേട്ടയ്യൻ രാജ (King Vettaiyan) എന്ന കഥാപാത്രത്തെയാണ് 'ചന്ദ്രമുഖി 2'ല്‍ രാഘവ ലോറന്‍സ് അവതരിപ്പിക്കുന്നത്. പോസ്‌റ്ററില്‍, കൊട്ടാരത്തിന്‍റെ ഗോവണിപ്പടിയില്‍ നിന്നും ഇറങ്ങി വരുന്ന രാഘവ ലോറന്‍സിന്‍റെ കഥാപാത്രത്തെയാണ് കാണാനാവുക. പച്ചയും മെറൂണും കലര്‍ന്ന രാജയീക വേഷത്തില്‍, ദേഹമാസകലം ആഭരണങ്ങള്‍ അണിഞ്ഞിരിക്കുന്ന താരത്തിന്‍റെ ഫസ്റ്റ് ലുക്ക് പോസ്‌റ്റര്‍ ഇതിനോടകം തന്നെ ശ്രദ്ധ നേടിക്കഴിഞ്ഞു.
രാഘവ ലോറന്‍സും തന്‍റെ സോഷ്യല്‍ മീഡിയ പേജുകളില്‍ പോസ്‌റ്റര്‍ പങ്കുവച്ചിട്ടുണ്ട്. രജനികാന്തിനോട് നന്ദി രേഖപ്പെടുത്തിക്കൊണ്ടായിരുന്നു രാഘവ ലോറന്‍സിന്‍റെ ട്വീറ്റ്. തന്‍റെ ഈ കഥാപാത്രത്തെ ജനങ്ങള്‍ ഏറ്റെടുക്കാന്‍ രജനികാന്തിന്‍റെ അനുഗ്രഹവും പിന്തുണയും വേണമെന്നാണ് രാഘവ ലോറന്‍സ് കുറിച്ചത്.
'തലൈവർ സൂപ്പർസ്‌റ്റാറിന് നന്ദി! ഇതാ വേട്ടയ്യന്‍ രാജയുടെ (കിരീട ഇമോജി) ഫസ്റ്റ് ലുക്ക് നിങ്ങൾക്ക് മുമ്പില്‍ അവതരിപ്പിക്കുന്നു. എനിക്ക് നിങ്ങളുടെ എല്ലാവരുടെയും അനുഗ്രഹം വേണം! ഈ ഗണേശ ചതുർഥിയില്‍ തമിഴ്, തെലുഗു, കന്നഡ, മലയാളം, ഹിന്ദി എന്നീ ഭാഷകളിൽ ചിത്രം റിലീസ് ചെയ്യുന്നു! (ഫയർ ഇമോജി)' -ഇപ്രകാരമാണ് രാഘവ ലോറന്‍സ് ട്വീറ്റ് ചെയ്‌തത്.
വിനായക ചതുര്‍ഥി ദിനത്തില്‍ സെപ്‌റ്റംബര്‍ 19നാണ് ചിത്രം തിയേറ്ററുകളില്‍ എത്തുക. ബിഗ് ബജറ്റിലായി പി വാസുവാണ് സിനിമയുടെ സംവിധാനം. പി വാസുവിന്‍റെ 65-ാമത്തെ ചിത്രം കൂടിയാണിത്. മുൻനിര പ്രൊഡക്ഷൻ ഹൗസായ ലൈക്ക പ്രൊഡക്ഷൻസിന്‍റെ ബാനറിൽ സുഭാസ്‌കരനാണ് സിനിമയുടെ നിര്‍മാണം.