മുംബൈ: മഹാരാഷ്‌ട്രയിലെ താനെയില്‍ അപ്പാര്‍ട്ട്‌മെന്‍റില്‍ തീപിടിത്തം. ആളപായമില്ല. ഇന്ന് (ഓഗസ്റ്റ് 16) പുലര്‍ച്ചെയോടെയാണ് തീപിടിത്തമുണ്ടായത്. തീപിടിത്തത്തിന്‍റെ കാരണം വ്യക്തമല്ല. സംഭവത്തിന് പിന്നാലെ നാല് അഗ്‌നിശമന സേന സ്ഥലത്തെത്തി. തീ അണയ്‌ക്കാനുള്ള ശ്രമം തുടരുകയാണ്.
ഗ്യാസ് സ്റ്റേഷനിലെ സ്‌ഫോടനം: റഷ്യയിലെ ഡാഗെസ്‌താനില്‍ കഴിഞ്ഞ ദിവസമുണ്ടായ സ്‌ഫോടനത്തില്‍ 35 പേര്‍ മരിച്ചു. 115 പേര്‍ക്ക് ഗുരുതരമായി പരിക്കേറ്റു. അപകടത്തില്‍ മൂന്ന് കുട്ടികളും മരിച്ചിട്ടുണ്ടെന്ന് റഷ്യന്‍ ആരോഗ്യ മന്ത്രാലയം അറിയിച്ചു. പരിക്കേറ്റവരിലും 16 കുട്ടികള്‍ ഉള്‍പ്പെട്ടിട്ടുണ്ടെന്നും കുട്ടികള്‍ ഉള്‍പ്പെടെയുള്ളവരെ ആശുപത്രിയില്‍ എത്തിച്ചിട്ടുണ്ടെന്നും ആരോഗ്യ മന്ത്രാലയം പറഞ്ഞു. ഇക്കഴിഞ്ഞ തിങ്കളാഴ്‌ചയാണ് സ്‌ഫോടനം ഉണ്ടായത്. കാര്‍ റിപ്പയര്‍ ഷോപ്പിലുണ്ടായ തീപിടിത്തം സമീപത്തെ പെട്രോള്‍ പമ്പിലേക്ക് പടരുകയായിരുന്നു. ഇതാണ് വലിയ സ്‌ഫോടനത്തിന് കാരണമായത്.
ചെന്നൈയിലും സമാന സംഭവം: തമിഴ്‌നാട്ടിലെ തിരുപ്പൂരിലെ ബനിയന്‍ മാര്‍ക്കറ്റില്‍ അടുത്തിടെയാണ് വന്‍ തീപിടിത്തമുണ്ടായത്. ഖാദര്‍പേട്ട് ബസാര്‍ എന്നറിയപ്പെടുന്ന മാര്‍ക്കറ്റിലെ 50ലേറെ കടകളാണ് കത്തി നശിച്ചത്. ഹോള്‍സെയില്‍ റീട്ടെയില്‍ കടകളിലുണ്ടായിരുന്ന മുഴുവന്‍ വസ്‌ത്രങ്ങളും പൂര്‍ണമായും കത്തി നശിച്ചു. രാത്രിയില്‍ മാര്‍ക്കറ്റിലെ കടകളെല്ലാം അടച്ചതിന് പിന്നാലെയാണ് തീപിടിത്തമുണ്ടായത്. തീ ആളി പടര്‍ന്നത് ശ്രദ്ധയില്‍പ്പെട്ട നാട്ടുകാര്‍ പൊലീസില്‍ വിവരം അറിയിച്ചു. സംഭവത്തിന് നാല് അഗ്‌നി ശമന സേന യൂണിറ്റെത്തിയാണ് തീ അണച്ചത്.