ലക്‌നൗ :ഉത്തർപ്രദേശിൽ ടാക്സി ഡ്രൈവറെ നടുറോഡിൽ മർദിച്ച സംഭവത്തിൽ ലക്‌നൗ സ്വദേശിനിക്കെതിരെ കേസ്. മർദനത്തിനിരയായ സാദത്ത് അലി സിദ്ദിഖ് എന്ന യുവാവിന്‍റെ പരാതിയിലാണ് 28കാരിയായ യുവതിക്കതിരെ എഫ്ഐആര്‍ ഇട്ടത്.
റോഡ് മുറിച്ചുകടക്കുന്നതിനിടെ തന്‍റെ മേൽ ഇടിക്കാൻ വന്നെന്ന് ആരോപിച്ച് ടാക്സി ഡ്രൈവറെ യുവതി തുടർച്ചയായി കരണത്തടിക്കുന്ന ദൃശ്യങ്ങൾ സാമൂഹ്യമാധ്യമങ്ങളിൽ പ്രചരിച്ചിരുന്നു.
ഇതിന് പിന്നാലെ യുവതിക്കെതിരെ കനത്ത പ്രതിഷേധമാണുയർന്നത്. 'Arrest Lucknow girl' എന്ന ഹാഷ്‌ടാഗോട് കൂടി യുവതിയെ അറസ്റ്റ് ചെയ്യണമെന്ന ആവശ്യം ശക്തമായി. ഇതിന് പിന്നാലെയാണ് യുവതിക്കെതിരെ കേസെടുത്തത്.