പ്രണയബന്ധത്തെച്ചൊല്ലി തർക്കം ; മകൾക്ക് നേരെ അഞ്ച് തവണ വെടിയുതിർത്ത് പിതാവ്

പട്‌നയിലെ റെംഗനിയബാഗ് ഗ്രാമത്തിലാണ് പിതാവ് മകൾക്ക് നേരെ വെടിയുതിർത്തത്. പെണ്‍കുട്ടി അപകടനില തരണം ചെയ്‌തിട്ടുണ്ട്

പട്‌ന : പ്രണയബന്ധത്തെച്ചൊല്ലിയുണ്ടായ തർക്കത്തിനിടെ 21കാരിയായ മകൾക്ക് നേരെ വെടിയുതിർത്ത് പിതാവ്. പട്‌നയിലെ നൗബത്പൂർ പൊലീസ് സ്റ്റേഷൻ പരിധിയിലെ റെംഗനിയബാഗ് ഗ്രാമത്തിലാണ് സംഭവം. തർക്കത്തിനിടെ പ്രകോപിതനായ പിതാവ് ഋഷി ദേവപ്രസാദ് മകൾ മധുവിന് നേരെ അഞ്ച് തവണയാണ് വെടിയുതിർത്തത്. ഗുരുതരമായി പരിക്കേറ്റ പെണ്‍കുട്ടിയെ ആശുപത്രിയിൽ പ്രവേശിപ്പിച്ചു. പിതാവ് ഒളിവിലാണ്.

അതേസമയം വീട്ടിൽ തർക്കം ഉണ്ടായിട്ടില്ലെന്നും പിതാവ് അബദ്ധത്തില്‍ വെടിയുതിർക്കുകയായിരുന്നു എന്നുമാണ് പെണ്‍കുട്ടിയും മാതാവും നൽകിയിരിക്കുന്ന മൊഴി. എന്നാൽ ഇത് പൊലീസ് വിശ്വാസത്തിലെടുത്തിട്ടില്ല. പ്രതിയെ രക്ഷിക്കാനായുള്ള നീക്കത്തിന്‍റെ ഭാഗമാണ് ഈ മൊഴി എന്നാണ് പൊലീസിന്‍റെ നിഗമനം.

അതേസമയം പെണ്‍കുട്ടിക്കുണ്ടായിരുന്ന പ്രണയബന്ധത്തെച്ചൊല്ലി ഇരുവരും തമ്മിൽ തർക്കത്തിൽ ഏർപ്പെട്ടിരുന്നു എന്നും ഇതിന് പിന്നാലെയാണ് പിതാവ് വെടിവച്ചതെന്നുമാണ് അയൽവാസികൾ നൽകുന്ന വിവരം. അയൽവാസികൾ വിവരമറിയിച്ചതിനെ തുടർന്നാണ് പൊലീസ് സ്ഥലത്തെത്തി പെണ്‍കുട്ടിയെ ആശുപത്രിയിൽ പ്രവേശിപ്പിച്ചത്.

പരിക്കേറ്റ പെണ്‍കുട്ടി അപകടനില തരണം ചെയ്‌തിട്ടുണ്ട്. അതേസമയം സംഭവത്തിന് പിന്നിലെ യഥാർഥ കാരണം ഇതുവരെ കണ്ടെത്താനായിട്ടില്ലെന്ന് ബിഹ്ത എസ്എച്ച്ഒ രഞ്ജിത് കുമാർ പറഞ്ഞു. സംഭവത്തിൽ കൂടുതൽ അന്വേഷണം നടന്നുകൊണ്ടിരിക്കുകയാണെന്നും ഒളിവിൽ പോയ പ്രതിയെ ഉടൻ പിടികൂടുമെന്നും അദ്ദേഹം വ്യക്‌തമാക്കി.