ശ്രീനഗര്‍:എട്ട് ഇന്ത്യന്‍ നാവികസേന ഉദ്യോഗസ്ഥര്‍ക്ക് വധശിക്ഷ വിധിച്ച ഖത്തര്‍ നടപടി, ഇസ്രയേല്‍-ഹമാസ് യുദ്ധത്തില്‍ ഇന്ത്യന്‍ നിലപാടിന്‍റെ വീഴ്‌ചയാകാമെന്ന് ജമ്മു കശ്‌മീര്‍ മുന്‍ മുഖ്യമന്ത്രി ഡോ.ഫറൂഖ് അബ്‌ദുള്ള അഭിപ്രായപ്പെട്ടു. ഇടിവി ഭാരതിന് ഫോണ്‍ മുഖേന നല്‍കിയ പ്രത്യേക അഭിമുഖത്തിലാണ് ഫറൂഖ് അബ്‌ദുള്ള മനസുതുറന്നത്.
വിധി ആ സമയത്ത് വന്നത് ആശ്ചര്യകരം: മൂന്ന് വര്‍ഷമായി ഈ വിഷയത്തില്‍ (നാവിക സേന ഉദ്യോഗസ്ഥരുടെ വിചാരണ) ഖത്തര്‍ വെറുതെയിരിക്കുകയായിരുന്നു, എന്നാല്‍ പലസ്‌തീൻ വിഷയത്തിൽ അനുഭാവം പ്രകടിപ്പിച്ചുകൊണ്ട് ഇസ്രയേലുമായുള്ള സൗഹൃദബന്ധം നിലനിർത്തുന്നതിന് ഇന്ത്യ ശ്രമിക്കുന്ന സമയത്താണ് ഈ വിധി വന്നത് എന്നത് ആശ്ചര്യകരമാണെന്ന് ഫറൂഖ് അബ്‌ദുള്ള പറഞ്ഞു.
ഒക്‌ടോബർ 27 ന് ഗാസയില്‍ വെടിനിർത്തൽ സംബന്ധിച്ചുള്ള ഐക്യരാഷ്‌ട്ര സഭയുടെ ജനറൽ അസംബ്ലി വോട്ടെടുപ്പിനെ പിന്തുണയ്ക്കാൻ ഇന്ത്യ വിസമ്മതിച്ചപ്പോൾ തന്നെ വ്യക്തമായ ഈ ചായ്‌വ് കാണപ്പെട്ടതാണെന്നും അദ്ദേഹം വ്യക്തമാക്കി.