ന്യൂഡല്‍ഹി: ഇന്ത്യയില്‍ കാലാവധി കഴിഞ്ഞ കൊവിഡ് വാക്സിനുകള്‍ ഉപയോഗിക്കുന്നുണ്ടെന്ന മാധ്യമ റിപ്പോര്‍ട്ടുകള്‍ തള്ളി കേന്ദ്ര ആരോഗ്യ മന്ത്രാലയം. ഈ വാര്‍ത്തകള്‍ തെറ്റാണെന്നും ആളുകളെ തെറ്റിദ്ധരിപ്പിക്കുന്നതാണെന്നും ആരോഗ്യമന്ത്രാലയം പ്രസ്താവനയില്‍ പറഞ്ഞു.
കാലാവധി കഴിഞ്ഞ വാക്സിനുകള്‍ ഉപയോഗിക്കുന്നുണ്ടെന്ന വാര്‍ത്തകള്‍ അപൂര്‍ണമായ വിവരങ്ങളുടെ അടിസ്ഥാനത്തിലുള്ളതാണെന്നാണ്‌ കേന്ദ്ര ആരോഗ്യമന്ത്രാലയം വ്യക്തമാക്കുന്നത്‌. കൊവാക്സിന്‍റെ ഷെല്‍ഫ് ലൈഫ് നീട്ടണമെന്ന ഭാരത് ബയോടെക്കിന്‍റെ ആവശ്യം സെന്‍ട്രല്‍ ഡ്രഗ്‌സ്‌ സ്‌റ്റാന്‍ഡേര്‍ഡ്‌ കണ്‍ട്രോള്‍ ഓര്‍ഗനൈസേഷന്‍ (CDSCO) കഴിഞ്ഞ വര്‍ഷം ഒക്‌ടോബര്‍ 25 ന്‌ അംഗീകരിച്ചിരുന്നു. കൊവാക്സിന്‍റെ ഷെല്‍ഫ് ലൈഫ് ഒമ്പത് മാസത്തില്‍ നിന്ന്‌ 12 മാസമായാണ്‌ വര്‍ധിപ്പിച്ചത്‌.