ന്യൂഡല്‍ഹി: നവംബര്‍ 4, 2022ലെ സുപ്രീംകോടതി ഉത്തരവ് അനുസരിച്ച് അര്‍ഹരായ വരിക്കാര്‍ക്ക് ഉയര്‍ന്ന പെന്ഷന് ലഭിക്കുന്നതിനുള്ള ഓപ്ഷന് ഒരുക്കുന്നതിന് ഫീല്‍ഡ് ഓഫിസുകളോട് നിര്‍ദേശിച്ച് ഇപിഎഫ്ഒ (Employees Provident Fund Organisation). നവംബര്‍ നാലിലെ സുപ്രീംകോടതി ഉത്തരവിലെ ഖണ്ഡിക 44(ix) നിര്‍ദേശങ്ങള്‍ സമയബന്ധിതമായി നടപ്പിലാക്കാനാണ് ഫീല്‍ഡ് ഓഫിസുകള്‍ക്ക് നിര്‍ദേശം നല്‍കിയിരിക്കുന്നത്. ഈ വിഷയത്തില്‍ ഇപിഎഫ്ഒ എടുത്ത തീരുമാനത്തിന് പ്രചാരണം നല്‍കാനും ഫീല്‍ഡ്‌ഓഫിസുകള്‍ക്ക് സര്‍ക്കുലറില്‍ നിര്‍ദേശം ഉണ്ട്.
2014ല്‍ ഇപിഎസ് സ്‌കീമില്‍( Employees Pension Scheme) വരുത്തിയ ഭേദഗതിക്ക് സുപ്രീംകോടതി അംഗീകാരം നല്‍കിയിരുന്നു. 2014ലെ ഭേദഗതി പെന്ഷന് വേണ്ടി കണക്കാക്കുന്ന ശമ്പളത്തിന്‍റെ പരിധി 6,500ല്‍ നിന്ന് 15,000മായി ഉയര്‍ത്തിയിരുന്നു. കൂടാതെ 2014ലെ ഭേദഗതി യഥാര്‍ഥ ശമ്പളത്തിന്‍റെ 8.33 ശതമാനം ഇപിഎസില്‍ വകയിരുത്താന്‍ ജീവനക്കാര്‍ക്കും തൊഴിലുടമകള്‍ക്കും അവസരം നല്‍കുകയും ചെയ്‌തിരുന്നു.
സെപ്റ്റംബര്‍ 1, 2014 മുതല്‍ ഭേദഗതി പ്രാബല്യത്തില്‍ വന്നു. കൂടുതല്‍ പെന്ഷന് ലഭിക്കുന്ന സ്‌കീമിന്‍റെ (യഥാര്‍ഥ ശമ്പളത്തിന്‍റെ 8.33 ശതമാനം ഇപിഎസില്‍ അടയ്‌ക്കുന്ന സ്‌കീം) ഭാഗമാകാന്‍ ആറ് മാസത്തെ സമയവും അനുവദിച്ചു.