കാർ കനാലിലേക്ക് മറിഞ്ഞ് അപകടം ; മൂന്ന് ബി ടെക് വിദ്യാർഥികൾ മരിച്ചു

ഹേമന്ത്, ഹർഷവർധന്‍, ഉദയ് കിരൺ എന്നീ ബി ടെക് വിദ്യാർഥികൾ മരിച്ചു. കാറിലുണ്ടായിരുന്ന മൂന്ന് പേരെ പരിക്കുകളോടെ ആശുപത്രിയിൽ പ്രവേശിപ്പിച്ചു

രാജമഹേന്ദ്രവാരം : ആന്ധ്രാപ്രദേശിലെ ഈസ്റ്റ് ഗോദാവരി ജില്ലയിൽ കാർ കനാലിലേക്ക് മറിഞ്ഞ് മൂന്ന് എഞ്ചിനീയറിംഗ് വിദ്യാർഥികൾ മരിച്ചു. മൂന്ന് പേർക്ക് പരിക്കേറ്റു. കോരുകൊണ്ട മണ്ഡലത്തിലെ ബുരുഗുപുഡി ഗ്രാമത്തിൽ ഇന്ന് പുലർച്ചെയാണ് സംഭവം.

ഹേമന്ത്, ഹർഷവർധൻ, ഉദയ് കിരൺ എന്നീ വിദ്യാർഥികളാണ് മരിച്ചത്. അമിതവേഗതയിലെത്തിയ കാർ നിയന്ത്രണം വിട്ട് കനാലിലേക്ക് വീഴുകയായിരുന്നു എന്നാണ് പൊലീസ് പറയുന്നത്. ഏലൂർ നഗരത്തിനടുത്തുള്ള ഒരു സ്വകാര്യ എഞ്ചിനീയറിങ് കോളജിലെ മൂന്നാം വർഷ ബി ടെക് വിദ്യാർഥികളുടെ സംഘം സഞ്ചരിച്ച കാറാണ് അപകടത്തിൽപ്പെട്ടത്.

10 വിദ്യാർഥികളുടെ സംഘം രണ്ട് കാറുകളിലായി കിഴക്കൻ ഗോദാവരി ജില്ലയിലെ വെള്ളച്ചാട്ടങ്ങളുള്ള മാറേഡുമില്ലി ബയോ ഡൈവേഴ്‌സിറ്റി ഹബ്ബിലേക്ക് പിക്‌നിക്കിന് പോയി മടങ്ങി വരുന്ന വഴിയാണ് അപകടം ഉണ്ടായത്. ബുറുഗുപുഡി ഗേറ്റിലെ പഴയ പാലത്തിനും പുതിയ പാലത്തിനും ഇടയിലുള്ള കനാലിലേക്ക് കാർ മറിയുകയായിരുന്നു. അപകടത്തിൽപ്പെട്ട കാറിൽ 6 പേർ ഉണ്ടായിരുന്നു.

പരിക്കേറ്റ മറ്റ് മൂന്ന് പേരെ രാജമഹേന്ദ്രവാരം സർക്കാർ ആശുപത്രിയിൽ പ്രവേശിപ്പിച്ചു. പൊലീസ് സംഭവസ്ഥലത്തെത്തി അന്വേഷണം ആരംഭിച്ചിട്ടുണ്ട്.

ജാർഖണ്ഡിൽ ബസ് നദിയിലേക്ക് മറിഞ്ഞു, നാല് മരണം : ഇന്നലെ രാത്രി 8.40ഓടെ ജാർഖണ്ഡിൽ ബസ് നദിയിലേക്ക് മറിഞ്ഞ് അപകടം സംഭവിച്ചിരുന്നു. അപകടത്തിൽ നാല് പേരാണ് മരിച്ചത്. 20ഓളം പേർക്ക് പരിക്കേൽക്കുകയും ചെയ്‌തു. യാത്രക്കാരുമായി റാഞ്ചിയിൽ നിന്ന് നിന്ന് ഗിരിദിഹിയിലേക്ക് പോകുകയായിരുന്ന ബസാണ് ബരാകിർ നദിയിലേക്ക് മറിഞ്ഞത്. ബസിൽ 30ഓളം യാത്രക്കാർ ഉണ്ടായിരുന്നു എന്നാണ് വിവരം.

ഗിപിദിഹ്‌ - ദുമ്രി ദേശീയ പാതയിൽ വച്ച് ബസിന്‍റെ നിയന്ത്രണം നഷ്‌ടപ്പെട്ടതാണ് അപകടത്തിനിടയാക്കിയതെന്നാണ് പ്രാഥമിക നിഗമനമെന്ന് പൊലീസ് പറഞ്ഞു. നാട്ടുകാരും പൊലീസും സംയുക്തമായാണ് രക്ഷാപ്രവർത്തനങ്ങൾ നടത്തിയത്.

പരിക്കേറ്റവരെ ചികിത്സക്കായി ആശുപത്രികളിൽ പ്രവേശിപ്പിച്ചിട്ടുണ്ട്. ബസ് വെള്ളത്തിനടിയിലേക്ക് താഴ്‌ന്നതും പ്രദേശത്ത് ഇരുട്ടായിരുന്നതും രക്ഷാപ്രവർത്തനത്തെ പ്രതികൂലമായി ബാധിച്ചു.

ജൂലൈ 15ന് ഉത്തർ പ്രദേശിലെ മീററ്റില്‍ തീർഥാടകർ സഞ്ചരിച്ച വാഹനം വൈദ്യുതി ലൈനിൽ തട്ടി അപകടം സംഭവിച്ചിരുന്നു. അഞ്ച് പേർക്കാണ് അപകടത്തിൽ ജീവൻ നഷ്‌ടമായത്. വൈദ്യുതാഘാതമേറ്റ് 16 പേർക്ക് പരിക്കേൽക്കുകയും ചെയ്‌തു.

മീററ്റിലെ ഭവൻപൂരിലുള്ള റാലി ചൗഹാൻ ഗ്രാമത്തിൽ വച്ചാണ് വാഹനം വൈദ്യുതി ലൈനിൽ തട്ടി അപകടം സംഭവിച്ചത്. പ്രദേശത്ത് 11 കെവി (ഹൈടെൻഷൻ) വൈദ്യുതി ലൈൻ താഴ്‌ന്നുകിടക്കുകയായിരുന്നു. നാട്ടുകാർ സ്ഥലത്തെത്തി ഉടൻ തന്നെ അപകടത്തില്‍പ്പെട്ടവരെ അടുത്തുള്ള ആശുപത്രിയിൽ പ്രവേശിപ്പിച്ചു. 35 പേർ വാഹനത്തില്‍ ഉണ്ടായിരുന്നു എന്നാണ് വിവരം. മരിച്ചവരിൽ രണ്ട് സഹോദരന്മാരും ഉൾപ്പെടുന്നുവെന്ന് പൊലീസ്.