കെസിആറിനെ വീണ്ടും കണ്ട് പ്രശാന്ത് കിഷോർ; കൂടിക്കാഴ്‌ച കോൺഗ്രസ് പ്രവേശന അഭ്യൂഹങ്ങൾക്കിടെ

പ്രശാന്ത് കിഷോറിനൊപ്പമല്ല, ഐ-പാക്കുമായി ചേർന്നാണ് ടിആർഎസ് പ്രവർത്തിക്കുന്നതെന്ന വിശദീകരണവുമായി ടിആർഎസ് വർക്കിങ് പ്രസിഡന്‍റും കെസിആറിന്‍റെ മകനുമായ കെ.ടി രാമറാവു.

ഹൈദരാബാദ്:കോൺഗ്രസിൽ ചേരുമെന്ന അഭ്യൂഹങ്ങൾക്കിടെ തെലങ്കാന രാഷ്‌ട്ര സമിതി (ടിആർഎസ്) അധ്യക്ഷനും തെലങ്കാന മുഖ്യമന്ത്രിയുമായ കെ ചന്ദ്രശേഖർ റാവുവുമായി ചർച്ച നടത്തി തെരഞ്ഞെടുപ്പ് തന്ത്രജ്ഞൻ പ്രശാന്ത് കിഷോർ. ശനിയാഴ്‌ച മുഖ്യമന്ത്രിയുമായി കൂടിക്കാഴ്‌ച നടത്തിയ കിഷോർ ഞായറാഴ്‌ചയും ചർച്ച തുടർന്നതായി പാർട്ടി വൃത്തങ്ങൾ അറിയിച്ചു. അതേസമയം കൂടിക്കാഴ്‌ച എന്തിനാണെന്നതിനെ കുറിച്ച് ടിആർഎസിൽ നിന്ന് ഔദ്യോഗിക വിവരങ്ങളൊന്നും ലഭിച്ചിട്ടില്ല.

കൂടിക്കാഴ്‌ച അഭ്യൂഹങ്ങൾക്കിടെ: ഇരുവരും രാജ്യത്തെ സമകാലിക രാഷ്‌ട്രീയ സാഹചര്യത്തെക്കുറിച്ച് ചർച്ച ചെയ്‌തതായും തെലങ്കാനയിൽ തന്‍റെ സംഘം നടത്തിയ സർവേകളുടെ വിശദാംശങ്ങൾ കിഷോർ സമർപ്പിച്ചതായും സൂചനയുണ്ട്. തെരഞ്ഞെടുപ്പ് തന്ത്രജ്ഞനായ അദ്ദേഹം കോൺഗ്രസിൽ ചേരുമെന്ന ഊഹാപോഹങ്ങൾ നിലനിൽക്കുന്നതിനിടെ കെസിആറുമായുള്ള കിഷോറിന്‍റെ കൂടിക്കാഴ്‌ച പ്രാധാന്യമർഹിക്കുന്നതാണ്.

ഇടപെട്ട് കെടിആർ:അതേസമയം തെലങ്കാന മുഖ്യമന്ത്രിയുമായുള്ള പ്രശാന്ത് കിഷോറിന്‍റെ ചർച്ച തുടർച്ചയായ രണ്ടാം ദിവസവും തുടർന്നതോടെ, പാർട്ടിക്കുവേണ്ടി ഇന്ത്യൻ പൊളിറ്റിക്കൽ ആക്ഷൻ കമ്മിറ്റി (I-PAC) പ്രവർത്തിക്കുന്നതായി ഔദ്യോഗികമായി സ്ഥിരീകരിച്ച് ടിആർഎസ് വർക്കിങ് പ്രസിഡന്‍റ് കെ.ടി രാമറാവു. എന്നാൽ പ്രശാന്ത് കിഷോറിനൊപ്പമല്ല, ഐ-പാക്കുമായി ചേർന്നാണ് ടിആർഎസ് പ്രവർത്തിക്കുന്നതെന്നും അദ്ദേഹം വ്യക്തമാക്കി.

പ്രശാന്ത് കിഷോർ ടിആർഎസ് പാർട്ടിക്ക് ഐ-പാക് അവതരിപ്പിച്ചു. ഐ-പാക് ഔദ്യോഗികമായി തങ്ങൾക്കുവേണ്ടി പ്രവർത്തിക്കുന്നു. തങ്ങൾ പ്രശാന്ത് കിഷോറിനൊപ്പമല്ല, മറിച്ച് ഐ-പാക്കിനൊപ്പമാണ് പ്രവർത്തിക്കുന്നതെന്നായിരുന്നു കെടിആറിന്‍റെ പ്രതികരണം.

കഴിഞ്ഞ രണ്ട് പതിറ്റാണ്ടായി മുഖ്യമന്ത്രി ചന്ദ്രശേഖർ റാവു ടിആർഎസിനെ മുന്നോട്ട് നയിക്കുന്നു. അതോടൊപ്പം തന്നെ ഡിജിറ്റൽ പ്ലാറ്റ്‌ഫോം ഉപയോഗിക്കണമെന്നും പാർട്ടി ആഗ്രഹിക്കുന്നു. അതിനാൽ വരുന്ന തെരഞ്ഞെടുപ്പിൽ ടിആർഎസ് പാർട്ടിയെ ഐ-പാക് സഹായിക്കും. ഐ-പാക്കുമായി വേർപിരിഞ്ഞ പ്രശാന്ത് കിഷോർ ഇപ്പോൾ സ്വന്തം രാഷ്‌ട്രീയമാണ് പിന്തുടരുന്നതെന്നും അദ്ദേഹം കൂട്ടിച്ചേർത്തു.