ന്യൂഡൽഹി:പാക് ചാരസംഘടനയായഐഎസ്‌ഐക്ക് വേണ്ടി ചാരപ്പണി നടത്തിയതിന് അറസ്റ്റിലായ മലയാളിയായ മുൻ വ്യോമസേനാ ഉദ്യോഗസ്ഥന് ജാമ്യം (Delhi court grants bail to former IAF official for spying for ISI). വ്യോമസേനയിൽ ജൂനിയർ റാങ്കിംഗ് ഉദ്യോഗസ്ഥനായിരുന്ന മലപ്പുറം സ്വദേശി രഞ്ജിത് കെ കെ (Ranjith K K from Malappuram) എന്നയാൾക്കാണ് ഡൽഹി അഡീഷണൽ സെഷൻസ് കോടതി ജാമ്യം അനുവദിച്ചത്. ഹണിട്രാപ്പിൽ കുടുക്കി ഇയാളിൽനിന്ന് വ്യോമസേനയുടെ ഓപ്പറേഷനുകളുമായും മിലിട്ടറി ഇന്‍റലിജൻസുമായും ബന്ധപ്പെട്ട രഹസ്യരേഖകൾ ഐഎസ്ഐ കൈക്കലാക്കി എന്നാണ് കേസ്.
പ്രതികൾ ഏകദേശം ഏഴ് വർഷവും 10 മാസവും കസ്റ്റഡിയിൽ കഴിഞ്ഞിട്ടുണ്ടെന്നും, ഇത് ഇവർക്കെതിരെ ആരോപിക്കപ്പെടുന്ന കുറ്റത്തിന് നിശ്ചയിച്ചിട്ടുള്ള പരമാവധി ശിക്ഷാ കാലാവധിയുടെ പകുതിയിലധികം വരുമെന്നും ജാമ്യം നൽകിക്കൊണ്ട് അഡീഷണൽ സെഷൻസ് ജഡ്‌ജി അപർണ സ്വാമി നിരീക്ഷിച്ചു. പ്രതികൾക്ക് വേണ്ടി ഹാജരായ അഭിഭാഷകരായ ആകാശ് വാജ്‌പേയ്, ജാവേദ് അലി എന്നിവരുടെ വാദങ്ങൾ പരിഗണിച്ച ജഡ്‌ജി, പ്രതികളുടെ വിചാരണ വൈകിക്കാൻ കഴിയില്ലെന്നും വ്യക്തമാക്കി.
Also Read:സൈനികനെ പ്രണയം നടിച്ച് വലയില്‍ വീഴ്ത്തി ഐഎസ്ഐ ഏജന്‍റായ യുവതി ; ചോര്‍ത്തിയത് സൈനിക രഹസ്യങ്ങള്‍
'രേഖകൾ പ്രകാരമുള്ള എല്ലാ സാക്ഷികളെയും വിസ്‌തരിച്ചു. നിലവിൽ 12 സാക്ഷികളെ വിസ്‌തരിക്കാനുണ്ട്. പ്രതികൾക്ക് സ്വാധീനിക്കാൻ കഴിയാത്ത പോലീസ് ഉദ്യോഗസ്ഥരാണ് ഈ സാക്ഷികൾ. പ്രതി ഇതിനോടകം ഏഴു വർഷവും 10 മാസവും തടവുശിക്ഷ അനുഭവിച്ചിട്ടുണ്ട്.' ജാമ്യം അനുവദിച്ചുകൊണ്ടുള്ള ഉത്തരവിൽ കോടതി നിരീക്ഷിച്ചു.