ന്യൂഡൽഹി :കൊറോണയുടെ രണ്ടാം തരംഗം രാജ്യത്ത് പ്രതിസന്ധി സൃഷ്ടിക്കുന്ന സാഹചര്യത്തിൽ വാക്‌സിൻ നിർമ്മിക്കാനുള്ള അനുമതി കൂടുതൽ കമ്പനികൾക്ക് നൽകണമെന്ന് ഡൽഹി മുഖ്യമന്ത്രി അരവിന്ദ് കെജ്‌രിവാൾ. വാക്‌സിൻ നിർമാണത്തിനുള്ള ഫോർമുല പങ്കുവെയ്ക്കാനാണ് അദ്ദേഹം കേന്ദ്രത്തോട് ആവശ്യപ്പെട്ടത്. ഇത്തരത്തില്‍ രാജ്യത്ത് കൊവാക്‌സിന്‍റെയും കൊവിഷീൽഡിന്‍റെയും ഉത്പാദനം വർധിപ്പിക്കാൻ സാധിക്കുമെന്ന് കെജ്‌രിവാൾ പറയുന്നു.
നിലവിൽ സെറം ഇൻസ്റ്റിറ്റ്യൂട്ട് ഭാരത് ബയോടെക് എന്നീ കമ്പനികളാണ് വാക്‌സിൻ വികസിപ്പിക്കുന്നത്. ഈ കമ്പനികൾ പ്രതിമാസം ആറ് മുതൽ എഴ് കോടി വരെ ഡോസ് വാക്‌സിനാണ് ഉത്പാദിപ്പിക്കുന്നത്. ഈ രീതിയിൽ എല്ലാവരിലേയ്ക്കും വാക്‌സിൻ എത്തിക്കാൻ ഏറെ സമയമെടുക്കും.വാക്‌സിൻ നിർമ്മിക്കാൻ കൂടുതൽ കമ്പനികളെ അനുവദിച്ചാൽ വിതരണം ത്വരിതപ്പെടുത്താൻ സാധിക്കുമെന്ന് കെജ്‌രിവാൾ അറിയിച്ചു.