ന്യൂഡൽഹി: ഡൽഹി മുനിസിപ്പൽ കോർപ്പറേഷൻ തെരഞ്ഞെടുപ്പിലെ പരാജയത്തിന് പിന്നാലെ ഡൽഹി ബിജെപി അധ്യക്ഷ സ്ഥാനം രാജിവെച്ച് ആദേശ് ഗുപ്‌ത. തെരഞ്ഞെടുപ്പിൽ ബിജെപിയുടെ 15 വർഷത്തെ ഭരണം അവസാനിച്ച് ആംആദ്‌മി ഭരണം പിടിച്ചെടുത്തതിന് പിന്നാലെയാണ് രാജി. പുതിയ അധ്യക്ഷനെ തെരഞ്ഞെടുക്കുന്നതു വരെ ബിജെപിയുടെ ഡൽഹി ഘടകം വൈസ് പ്രസിഡന്‍റ് വീരേന്ദ്ര സച്ച്‌ദേവയെ ആക്‌ടിങ് പ്രസിഡന്‍റായി നിയമിച്ചു.
ഡൽഹി മുനിസിപ്പൽ കോർപ്പറേഷൻ തെരഞ്ഞെടുപ്പിൽ ആകെയുള്ള 250 സീറ്റുകളിൽ 134 സീറ്റുകളിലും വിജയിച്ചാണ് ആംആദ്‌മി ഭരണം പിടിച്ചെടുത്തത്. ബിജെപി 104 സീറ്റുകൾ നേടി. അതേസമയം തെരഞ്ഞെടുപ്പ് ചിത്രത്തില്‍ എവിടെയുമില്ലാത്ത സ്ഥിതിയായിരുന്നു കോണ്‍ഗ്രസിന്. വെറും ഒന്‍പത് സീറ്റ് മാത്രമാണ് കോണ്‍ഗ്രസ് നേടിയത്.