ന്യൂഡൽഹി: രാജ്യത്തെ 38 ഗവേഷണ സ്ഥാപനങ്ങളുടെ കൂട്ടായ്‌മയായ കൗൺസിൽ ഓഫ് സയന്‍റിഫിക് ആൻഡ് ഇൻഡസ്‌ട്രിയിൽ റിസർച്ചിന്‍റെ (സിഎസ്ഐആർ) ആദ്യ വനിത ഡയറക്‌ടർ ജനറലായി മുതിർന്ന ശാസ്‌ത്രജ്ഞ നല്ലതമ്പി കലൈശെൽവി. നിലവിൽ കാരൈക്കുടിയിലെ സിഎസ്ഐആർ-സെൻട്രൽ ഇലക്ട്രോകെമിക്കൽ റിസർച്ച് ഇൻസ്റ്റിറ്റ്യൂട്ടിന്‍റെ (CSIR-CECRI) ഡയറക്‌ടറാണ് കലൈശെൽവി. ഏപ്രിലിൽ വിരമിച്ച ശേഖർ മണ്ടേയുടെ പിൻഗാമിയായാണ് കലൈശെൽവിയുടെ നിയമനം.
മണ്ടേയുടെ വിരമിക്കലിന് ശേഷം ബയോടെക്‌നോളജി വകുപ്പ് സെക്രട്ടറി രാജേഷ് ഗോഖലെയ്‌ക്കായിരുന്നു സിഎസ്ഐആറിന്‍റെ അധിക ചുമതല നൽകിയിരുന്നത്. ലിഥിയം അയൺ ബാറ്ററി മേഖലയിലെ പ്രവർത്തനത്തിന് പേരുകേട്ട കലൈശെൽവി ശാസ്ത്ര-വ്യവസായ ഗവേഷണ വകുപ്പ് സെക്രട്ടറിയുടെ ചുമതലയും വഹിക്കും. രണ്ട് വർഷത്തേക്കാണ് കലൈശെൽവിയുടെ നിയമനമെന്ന് പേഴ്‌സണൽ മന്ത്രാലയം അറിയിച്ചു.